Un felis djabièrnè pa nos lektornan...

 Otro wikènt kaminda tin basta moveshon riba kaya...

Fiestanan pa kua tin espektativa grandi i algun fiesta ku ya a ‘sold out’ i otronan ku a bati alarma pasó karchinan ta den kaba...

Great pa tuma nota ku e konsierto di Jazz organisá den kuadro di e selebrashon di 25 aña di Blues Restaurant na Avila Beach Hotel a produsí riba 4 mil florin ku kua a hasi un donashon na Sentro Kultural Kòrsou...

Di músiko pa futuro músikonan...

E último biaha ku mi a tuma nota di un presentashon di e Kor di Maestronan Penshoná mi a pone ku e siguiente mi ta bai...

Awèl e siguiente a tuma lugá dia 3 di desèmber último i mi no tabata sa...

Aworakí mi mester aserká un dje miembronan pa nan pone mi na altura di nan presentashon...

Awe ta dia dje ‘gimmick’ di Karnaval...

Awe tardi di 6’or pa 9’or lo bende karchi pa apertura di Karnaval dia 6 di yanüari na preis redusí...

Benta di karchi ta tuma lugá na sede di Karnaval ku ta keda na Zona Kultural, eks Teatro Luna Blou...

Pa esnan ku biaha pasá no a logra di kumpra karchi pa Festival di Tumba, mañan bo tin chèns atrobe...

Licores Maduro huntu ku AMAK ta duna bu e chèns pa entre 10’or di mainta pa 1’or di mèrdia bo kumpra bo karchi na ‘The Store’ di Licores Maduro...

Ayera tardi Fundashon JAG a organisá un rueda di prensa kaminda nan a duna un splikashon relashoná ku e aktividat di Apertura di Karnaval ...

E motibu prinsipal di esaki ta debí na komentarionan relashoná ku e preis di entrada ku ta kobrando i ku a bira un motibu di krítika...

E organisashon a duna un splikashon kompletu dje aktividat i esaki ta keda kompartí awe den ‘DEN E BEMBE’...

Algu di lamentá durante dje rueda di prensa ta na momentu ku kolega Oswaldo Dulzaides a lanta di duna su opinion riba e echo ku ta kobrando pa un evento pa pueblo di Kòrsou...

E manera no táktiko ku a praktikamente ‘ataká’ Oswaldo despues di su pregunta i remarke sigur no ta algu di apresiá ...

Pa kolmo esun ku a hasi esaki ta e maestro di seremonia dje evento, MC Monti...

E organisashon mester tene kuenta ku e manera di reakshoná i mester ta bon kla den e organisashon ta ken ta e persona ku ta hiba palabra na nòmber dje organisashon...

‘Kòrá’ Faneite a indiká esaki bon kla na e organisashon...

‘Louie Louie’ a baha bai laga e rueda di prensa pasó e loke a sosodé no ta di aseptá, a ni un despensa despues no ta aseptá mirando e daño ku a wòrdu hasí...

Por pidi despensa, pero esei no ta yuda, e manera ku e reakshon a tuma lugá ku henter direktiva riba stage huntu ku kolaboradornan i niun hende no ta para Monty, no... no por...

Ma bai aki, Felis wikènt!.