Un bon siman pa tur nos lektornan...

Nos ta habri siman ku e notisia tristu ku un dje baluartenan pa loke ta trata baile folklóriko di Kòrsou a fayesé...

Peppie Sluis, gran baluarte di Kultura i folklor di Kòrsou a fayesé di forma repentino djabièrnè último...

Peppie su kontribushon na mantenshon di Kultura di nos Pais tabata inmenso...

Kondolensia i forsa na su famianan...

Bringamentu na WTC tabata tópiko fo’i djabièrnè mardugá i durante henter wikènt...

Pakiko bo tin ku bai fiesta i sea fuma òf no fuma bo ta maltratá un hende dje forma manera e hóben a keda maltratá ...

Hustisia mester prevalesé den e kaso aki...

Kachete kibrá i Dios sa kiko mas lo e tin komo konsekuensia dje maltrato...

E pregunta grandi, unda e bewakernan tabata?...

Niun hende no por a para e maltrato ku tabata tumando lugá?...

Ba nòkout e persona i ainda bo tin ku trap’é den su kara? ...

Un abuzu kompletu...

E asistensia na e reunion ku Kas di Kultura a yama relashoná ku e último akontesimentunan ku tur grupo di tambú i aguinaldo no tabata di kanta makamba...

E kantidat tabata hopi abou...

Un total di 12 punto di atenshon ta loke ku a keda konstatá ku mester di un kontesta pa mas tardá e siman aki mes...

Pa awe Kas di Kultura i departamento di Pèrmit di Kuerpo Polisial a keda pa kuminsá traha riba e puntonan pa dje forma ei por informá e lidernan di e resultadonan...

Kambionan den e kondishonnan pa por risibí un pèrmit, sigur den e parti di seguridat a pone ku tei bira hopi difísil pa na sierto sitionan por tin un presentashon...

Kas di Kultura a keda pa wak ku kiko nan por aportá pa keda mantené e tradishon di presentashon di Aguinaldo i Tambú pa públiko na sitionan habri...

Mi ta bai di akuerdo ku Sra. Emly Francisca, direktor di Kas di Kultura ku mester a atendé e puntonan di atenshon promé ku e temporada a kuminsá pa dje forma ei garantisá un temporada sin problema...

Kambionan ku tuma lugá durante dje temporada mester ta a base di situashonnan úniko ku a presentá i no kambio radikal ku ta trese e organisashon di un presentashon den desbalanse...

Nos a drenta e siman di Pasku i bo ta ripará mesora ku kaya ta kuminsá bira drùk i tur hende tin hansha pa kore hasi nan kosnan...

No tin komprenshon i tur hende ta sinti nan tenchi di pia trapá fo’i djaleu...

Ban trankil, ta un wikènt di selebrashon kaminda ta rekordá nasementu di Jesus, no ta fin di mundu...

Bon siman, ban sigui traha pa adelanto di nos Pais ...