Un felis djárason pa tur nos lektornan...

Nos ta pendiente pa e selebrashon di Pasku di Nasementu...

Ma tuma nota ku misanan katóliko ta hopi yen pa Misa di Aurora...

E parokianonan por keda sin bishitá Misa durante di aña, pero pa Misa di Aurora tur tei presente...

Segun ma komprondé Obispado te hasta a risibí asistensia di Pastor ku a bini pa kubri misanan di Aurora na e Misanan ku no tin Pastor...

Pa otro siman AMAK lo tene nan rueda di prensa relashoná ku Festival di Tumba 2018...

Feco a bisa ku e no ta laga aña bòltu, e ta tene su rueda di prensa pa duna tur detaye i alabes presentá su partnernan pa edishon number 48 dje festival...

Djasabra awor Fundashon JAG, organisadónan di Karnaval 2018 lo tin un spesial pa karchi di Apertura di Karnaval na Sambil...

Probechá kumpra bo karchi na preis redusí pa bo ta den e tremendo apertura ku nan ta organisando dia 6 di yanüari den Carnival Village na Kleine Werf...

Ata e presentashon di ‘Spice’ ku mester a tuma lugá na Kòrsou a bira notisia internashonal...

E artista tabata pendiente pa presentá na Kòrsou, pero sin ku el a keda poné na altura su presentashon no a kontinuá...

E promotor a keda sin paga su pasashi i loke ta mas pió, no a yama e artista bisé ku a kanselá e presentashon...

No ta promé biaha ku ‘Spice’ mester a bini Kòrsou, na vários okashon su presentashon a keda kanselá...

Awor ta parse ku e insidente a yega te na e portal di TMZ ku a duna atenshon n’e kaso aki...

Un promotor no ta imaginá su mes ki daño e por hasi na e pais ku tipo di desishon ku el a tuma...

Ta manera un konosí a komentá, e kos aki tei pone ku artistanan di Jamaica sigur lo bai pone yen kondishon pa nan presentashon na Kòrsou...

Den pasado tabatin e plan pa ora un promotor hasi petishon pa un artista pa e por demostrá ku e tin sufisiente fondo pa por organisá su aktividat...

E pensamentu aki a keda barí for di mesa, pero mi ta kere ku awor si mester bai na introdusí un lista di kondishon aserka di loke tin kaba pa promotornan ku no tin ‘sufisiente fondo’ no risibí un pèrmit pa un evento i podisé te hasta stroba un otro ku tambe kier a organisá un evento pero ku a entregá petishon lat...

Aserka, e promotor ku kanselá presentashon di un artista i òf evento na mas ku 1 okashon, no mester bin na remarke pa un pèrmit durante dje aña ku e kier a organisá e evento....

Tin algun promotor ku ta eksperto den blòkia fecha i stroba otronan ku si ta serio i kapas pa organisá un evento...

‘LOUIE LOUIE’ tei move, djabièrnè mi tei bèk...