Un felis djabièrnè pa tur nos lektornan...

Nos a yega awe na e último edishon di ‘Louie Louie’ pa 2017...

E aña a pasa mané lihé, pero pa nos tabata un plaser pa por produsí kada edishon di ‘Louie Louie’ pa nos lektornan di EXTRA...

Danki pa a sigui nos durante di 2017 i nos ta spera ku den 2018 mané kustumber bo ta sigui kumpra bo EXTRA i lesa e rúbrika di farándula, ‘Louie Louie’...

Nos sa ku no ta tur biaha ora ku nos ta duna nos opinion riba susesonan den farándula ku lo bo ta di akuerdo ku nos, pero nos ta trata tur biaha pa di e forma mas sinsero informá i eduká nos lektornan riba tópikonan ku nos atendé...

Loke pa nos ta importante ku tin biaha loke nos informá den nos kolumna ta bira punto di diskushon i kombersashon serka esnan ku e tópiko a toka...

Farándula di Kòrsou mester di un push enorme pa e por lanta para bèk riba pia...

Union ta e palabra mágiko ku difísilmente bo por logra, pero pone tur hende su nanishi den mesun direkshon si no ta dje difísil ei...

Formashon musikal na Kòrsou ta algu ku ta bayendo bon, pero tin demasiado organisashon embolbí den esaki na mi pareser...

E kuríkulo di formashon musikal no ta definí i esaki na mi opinion mester bira e punto di atenshon pa 2018...

Ministerio di Edukashon lo tin di hunga un ròl importante den esaki...

Mester por yega na un kònsènsùs kaminda tur organisashon ku ta duna formashon musikal ta hasi esaki den un kuadro teorétiko i práktiko ku ta kuadra ku otro...

Pa loke ta trata AMAK, e organisashon mester traha riba su base di miembresia...

Na diferente okashon e organisashon ta yama reunion, pero e asistensia ta pober...

E músikonan riba nan mes tambe mester mustra interes di ta forma parti di un organisashon manera AMAK ku na momentu di kualke situashon no faborabel pa e músikonan ta sali na nan defensa...

AMAK, den e situashon ideal, mester traha tambe riba e formashon di su músikonan ku ya ta adulto...

‘Masterclasses’ pa músikonan mester keda organisá i promové esaki adelantá pa atraé interes di músikonan...

Kòrsou tin un sin fin di sitionan di dibertishon kaminda nos artistanan lokal ta presentá...

Nos ta reklamá ku no tin ‘nightlife’, pero e tei, e echo ku e públiko no ta move mas manera ántes ta pone ku doñonan di sentronan di dibertishon no ta bai riska mas pa pone evento sigur den siman sabiendo ku e chèns pa atraé públiko ta hopi difísil...

Awor ku ta premirá ku nos lo risibí mas turista via di barkunan krusero, mester traha urgente riba e merkado aki i nos músikonan mester ta kreativo pa por gana algu afó...

Na final di nos ‘Louie Louie’ di awe mi kier a manda palabranan di kondolensia na famia Juliet ku fayesimentu di nan ruman, Kenneth Juliet...

Palabranan di kondolensia tambe ta bai na famia Hernandez, spesialmente pa Doña Saida Hernandez i Sherman Hernandez. Ku Don Eithel Hernandez sosegá na pas...

Felis kambio di aña !. Tur kos bon den 2018...