Un felis aña nobo pa tur nos lektornan...

Mi ta spera ku kada un di nos logra nos metanan pa 2018...

Keda di focus pa bo logra bo metanan ...

Awe nos ta kuminda ku e promé edishon di ‘Louie Louie’ pa 2018...

Nos ta spera ku manera semper bo sigui lesa e kolumna i ku nos puntonan di atenshon i òf remarke pa kualke situashon ku por presentá den farándula aki na Kòrsou ta un punto di diskushon pa mehora nos farándula...

Nos a kaba ku selebrashon di fin di aña i a bòltu drenta temporada di Karnaval mesora...

Chèk e kalènder di aktividatnan aki na Kòrsou i bo ta yega fásil na e konklushon ku nos ta un pais di selebrashon...

Hopi aktividat ta keda organisá anualmente riba nos isla i bo por bisa ku tur luna tin un aktividat ku ta ‘highlight’ e luna...

Djasabra awor ta apertura di Karnaval i awe tin e último ‘gimmick’ pa loke ta trata benta di karchi pa Apertura di Karnaval...

E gimmick ta redusí e preis di entrada ku 10 florin i ta duna bu aserka un 6-pack di serbes Presidente...

Serbes Presidente ta e spònser prinsipal di ‘Carnival Village’ motibu pa kua nan ta duna pueblo e chèns úniko aki pa kumpra e karchi na preis redusí...

Promé ku nos sigui ku informashonnan di Karnaval nos mester menshoná ku un biaha mas e evento di Grupo Trinchera ‘Tambú kombidá’ na Hòfi Sterke Yerke a resultá un éksito...

Hendenan a baila i gosa durante dje aktividat i kantantenan di tambú a duna tremendo presentashon...

Tantu riba potrèt komo riba video bo por a opservá un públiko kontentu disfrutando di loke nan gusta, e músika di tambú...

Nos ta pendiente pa den e siman aki AMAK anunsiá nan siguiente rueda di prensa kaminda nan lo bai duna tur detaye relashoná ku Festival di Tumba 2018...

E promé rueda di prensa tabata pa djis kalentá den bulpen, awor si mester bin ku tur detaye manera entre otro e anunsio dje sobra ‘brandingpartner’ i na ken e Festival ta dediká...

Tin nòmber di dos persona a keda menshoná i nos no sa ku e intenshon ta pa dedik’é na nan dos...

Na nos humilde opinion tin un dje nòmbernan ku meresé e Festival dediká na dje so, sin kuent’i kompartí honor...

Mi ta spera ku AMAK tuma e desishon korekto den e kaso aki...

Tin un músiko ku ta harmando un ‘super banda’ pa bai Tumba kuné...

Djis kòrda traha bo budget bon, pasó ora bo konta ‘brass’ den e kos ei, tur sèn ta bai...

Nos tei move, djabièrnè nos tei bèk ku mas informashon pa bo...

Un felis dia pa bo i si awe ta bo promé dia di trabou pa 2018, ban ke mesun ánimo pa traha pa adelanto di nos Pais !...