Nos a yega na fin di e promé siman di 2018... 

E wikènt aki ta wikènt di apertura di Karnaval 2018 ku un tremendo show riba Kleine Werf ku lo keda kombertí di ‘Carnival Village’...

Espektativanan ta basta haltu i nos ta pendiente pa eksperensia e evento ku Fundashon JAG i ‘Action Group’ a hinka den otro...

Ayera Polis, Brantwer i e departamento di ‘Veiligheidsinspectie’ a bai kontrolá na Kleine Werf...

Segun ‘Louie Louie’ por a komprondé nan a bai tuma informashon relashoná ku e ‘set up’ dje evento i mesora a duna nan punto di bista i tambe konseho na Fundashon JAG...

Esaki a trese kuné ku e idea original mester a keda adaptá pa motibunan di seguridat i pone ku awor ta 1 stage lo tin kaminda e presentashon di tur artista lo tuma lugá...

Ayera nochi nos a kombersá un ratu ku un hende yegá na Fundashon JAG ku a indiká ku el a keda desepshoná pa e manera kon a tuma desishon i kambia e konsepto dje evento...

E ta lamentá ku tin hendenan ku no ta habrí pa inovashon i konseptonan nobo pa loke ta trata evento...

E kos ei a pone mi kòrda kon algun aña atras un konosido personahe karnavalesko a bisa ku e hendenan ku ta tumando desishon no tin Karnaval na pechu...

Tin un kantidat di konsierto ku a tuma lugá riba Kleine Werf ku a konta ku asistensia ‘grandi’ i nunka no tabatin un kontròl tan estrikto...

Bèrdat ta ‘mihó koyon ku Dios pordon’, pero si a atendé e petishon di pèrmit for di dia ku esaki a keda entregá e organisashon lo tabatin e oportunidat di adaptá e konsepto di nan evento na un ku lo a kuadra ku nan pensamentu...

Ta di lamentá ku e kontròl a tuma lugá 2 dia promé ku e evento...

Den pasado a yega di proponé pa bini ku un sistema pa atendé petishon pa evento kaminda e petishon lo a tuma lugá 8 siman promé ku e evento i ku 6 siman promé ku e evento ya e organisadó lo tabatin un desishon den su man pa dje forma ei e por a organisá su evento trankil...

Te hasta ora ku lo a ninga un petishon pa evento, tòg e organisadó lo tin chèns pa entregá un karta di apelashon kontra dje desishon, pero manera e situashon ta aworakí, e no ta posibel, sea bo ta kanselá bo evento òf bai na amèn ku e desishon tumá...

Awe nochi tin e promé jump-in di temporada. Grupo Isla na Rust & Burgh...

Djadumingu ta fecha pa e grandioso tambú ‘Domingu di Tres Rei’ na Museo di Tambú ‘Shon Cola’...

Disfrutá di bo wikènt, nos ta topa na Apertura di Karnaval 2018...