Un felis djabièrnè pa tur nos lektornan...

E promé edishon di ‘Louie Louie’ ta riba merkado...

Awe nos lo tin algun komentario mas riba Karnaval i ta pendiente tambe pa duna algun informashon relashoná ku e temporada di Seú ku a kuminsá...

Un dje bandanan ku mi a lubidá di menshoná ku a zona bon durante di Marchanan di Karnaval tabata ‘Focus’...

Ramon Martinez a pone e spikernan di ‘Ixora’ zona mes...

Mañan Fundashon JAG tin un dia di evaluashon kaminda huntu ku algun invitado nan lo bai repasá e temporada di Karnaval 2018 i lo analisá i aseptá rekomendashon riba detayenan ku mester mehorá pa Karnaval 2019...

Bon ku e evaluashon ta tuma lugá tempran, ya tur hende tin tur detaye fresku den nan memoria...

Meskos mester tuma lugá ku AMAK, e organisashon mester yama un reunion ku su miembronan pa evaluashon di Festival di Tumba 2018...

Miembronan tabatin algun remarke despues di Festival di Tumba ku mester keda atendé...

E grupo ku a reuní segun mi tambe por pidi un reunion èkstra ordinario pa atendé nan puntonan di preokupashon...

Segun mi si bo tin 25 firma di miembro aktivo, bo ta aserká e organisashon i pidi un reunion ku bo puntonan di agènda...

AMAK tambe mester ta habrí pa atendé e preokupashon aworakí i no laga esaki bai drumi...

Ta manera un miembro prominente di AMAK a skibi poko dia ei riba ret sosial: “Tur ke kome karni i bebe lechi, drumi pechu ariba anto respu lubidá, pero e baka mes niun no ke kri’é ni mantené”

Esaki relashoná ku e tokamentu di Tumba durante di marchanan di Karnaval...

Un bèrdat ku no por kita for di bista ta e echo ku lidernan di grupo ta deliniá huntu ku e banda e repertorio ku ta keda toká, ta loke miembronan pidi ta zona pa nan gosa...

Temporada di selebrashon di fiesta di Seú a kuminsá...

Djasabra awor ta fecha pa inskripshon di gruponan di Seú...

Djadumingu ta inskripshon pa ‘Kantadó Mayo 2018’...

Fechanan di ‘Kantadó Mayo’ ta 6,7 i 8 di mart, e final lo ta dia 10 di mart...

Tin indikashon ku ta bai bèk Klup di Shell despues ku aña pasá a purba atrobe na Festival Center...

Mi ta kere ku mester reuní ku gruponan rítmiko pa wak kiko ta nan deseo, e echo ku tin intenshon di bai bek Klup di Shell defakto FKSK, Fundashon Kultural Seú Kòrsou, ta dal un stap bèk...

E evento a surpasá na públiko na vários okashon e límite di Klup di Shell...

Dikon no ta bolbe sondia e posibilidat pa organisá e evento riba e lugá di parker di MCB na Skalo...

Aki e festival a konosé un otro dimenshon...

Nos ta komprondé ku e gastunan pa organisá e evento lo ta hopi mas karu ora ku bai kualke sitio ku no ta Klup di Shell, pero mester por hasi e invershon pa por logra adelanto di un dje eventonan musikal kultural importante di nos Pais...

Nos tei move, djaluna nos tei bek ku otro edishon di ‘Louie Louie’... Felis wikènt...