Bon siman...

76 partisipante a inskribí pa partisipá e aña aki na ‘Kantadó Mayo’...

E kantidat ta 1 ménos ku loke a inskribí aña pasá si mi no ta ekiboká...

FKSK, Fundashon Kultural Seú Kòrsou a tuma e desishon ku ta bai bèk Klup di Shell ku e evento, loke segun ami ta un fayo grandi...

E evento a krese i a surpasá e kapasidat di Klup di Shell, loke e organisashon mester hasi ta kuminsá traha fo’i tempran pa bo por logra haña un sitio adekuá pa organisá e evento...

Siman pasá djabièrnè nos a elaborá kaba riba esaki, pero awe mi ta ripití pasó nan mester hasi algu...

Mi por komprondé ku e set-up den Klup di Shell ta mas barata i ku e seguridat ei den ta mas fásil pa bo atendé ku na un lugá habrí...

E organisashon mester por yega na un fórmula pa por hasi esaki...

E aña aki atrobe a keda demostrá ku nos hóbennan tin kultura na pechu. Hopi hóben a inskribí pa partisipá den Kantadó Mayo...

Keda pendiente pa anunsio grandi pa loke ta trata un evento ku ta na kaminda...

Kosnan great na kaminda tantu pa hubentut komo pa esnan mas madurá...

Definitivamente algu great pa e promé mitar di aña...

E kalènder di aktividatnan di Kòrsou ta kuminsá yena ku sigur dos evento grandi den e promé mitar di 2018...

Djasabra último ‘Louie Louie’ a asistí na e reunion di evaluashon di Karnaval 2018 ku Fundashon JAG a organisá...

No ta wega, ta hopi traba e hendenan di JAG a pasa aden...

Te na e momentunan aki tur kos ta mustra ku e organisashon a logra di kumpli ku e mandato di Gobièrnu i a logra di sera e temporada di Karnaval 2018 ku un saldo positivo...

Den e dianan aki nan lo bai kaba di atendé e parti atministrativo pa dje forma ei ora nan ta kla nan hasi entrega di tur dokumentu na Minister di Kultura...

Djasabra e evaluashon a kana den un bon ambiente...

No a logra pa kaba di atendé tur e puntonan ku mester a diskutí i evaluá riba dje...

Ta pendiente pa un seshon mas kaminda lo kaba di evaluá e marchanan di Karnaval...

‘Louie Louie’ a tuma nota ku nos a risibí basta komentario riba e artíkulo ku a keda publiká siman pasá titulá “Interes a baha òf mester kambia ruta?” ...

E komentarionan riba nos wèpsait a duna indikashon mesora riba loke e pensamentu di nos lektornan ta pa ku e punto di diskushon...

Den e siman aki nos lo bin ku un reakshon riba e artíkulo aki ...

Bon nos tei move, djárason nos tei bèk ku mas informashon i komentario farandulero...

Bon siman !...