Nos a yega djabièrnè...

Ayera nochi e atenshon tabata riba e presentashon di Jeon den ‘Premio Lo Nuestro’...

For di ayera ku el a bai ensayo e interes pa ku su presentashon a kuminsá krese i awe e klímaks a yega ora ku el a subi tarima i presentá...

Mi ta kontentu pa mira un hóben ku a kuminsá djabou logra yega dje leu ei...

Su perseveransia a pone ku awe e ta kaminda e ta ...

‘Aruba, Kòrsou i Boneiru...One Love’ tabata palabranan ku Jeon a ekspresá na final di su presentashon...

Great pa mira un mucha di pueblo, logra...

Tin hopi mas asin’aki rònt mundu, pero esaki ta serka, anto ku un komposishon ku tin algun letra na papiamentu den dje...

I Jeon ta na kaminda pa Kòrsou, esei ta loke ma komprondé ayera nochi ...

Próksimamente e informashon di su presentashon na Kòrsou ta bai bira konosí...

Ayera ma tende di otro evento grandi ku tin na kaminda pa Kòrsou den luna di yüli 2018...

E evento aki ta mustra di bai bira algu grandi ku nos Pais lo por bira orguyoso di dje...

E ‘brain’ tras dje evento aki a traha vários aña riba esaki i loke ku el a logra ta riba propio perseveransia...

Bo mester ta un ‘Lucky’ lady pa bo logra esaki...

Keda pendiente pa informashon riba e evento aki tambe...

Ayera Fundashon Kultural Seú Kòrsou a tene su rueda di prensa i a presentá su baluartenan di temporada di Seú 2018...

Gobièrnu a kita 75 mil florin for di e supsidio ku tabata duna e fundashon...

Esaki ta pone ku nan mannan ta praktikamente mará i ku ta ku masha kuidou nan lo tin ku organisá e eventonan ku nan a pone riba e kalènder di aktividat di Seú 2018...

Ta manera un hende a bisa ayera tur kos na Kòrsou ta kuminsá i kaba ku bòmbòshi...

Antayera e komishon nashonal di UNESCO Kòrsou a hasi entrega di ‘Premio Lenga Materno Papiamentu’ di UNESCO...

E premio ta dediká na persona òf instansia ku a hasi uso di lenga materno papiamentu di un forma eksepshonal...

Albert Schoobaar a resultá e ganadó di e premio aki...

Pabien na Albert, bon meresí...

Ma tende di un anunsio ku próksimamente lo tin presentashon di un nos artistanan lokal ku un orkesta sinfóniko...

For di despues di e homenahe na Doble R, mi tabata kombensí ku tin mas di nos artistanan ku meresé un spòtlait ku presentashon huntu ku un orkesta sinfóniko...

Ma komprondé ku e orkesta lo ta forma pa 60 músiko, loke ta indikativo ku ta un orkesta grandi...

Di loke ma keda informá, e hendenan tras dje presentashon dje orkesta a menshoná nòmber di dos konosido kantante ku nan lo ke kompañá...

Ta manera ku nos artistanan lo ta den spòtlait durante di 2018...

Nos tei move, bai trankil durante di wikènt, disfrutá i kòrda deskansá...

Te djaluna ku Dios ke !.