Un bon siman pa tur nos lektornan...

Djasabra a tuma lugá e di dos tanda di evaluashon di Karnaval 2018 ku miembronan di prensa...

LOUIE LOUIE no tabata presente pero a komprondé ku tur kos a kana bon i ku e aporte ku miembronan di prensa a duna tabata importante pa e organisashon...

Segun palabrashon ta e intenshon pa kada 2 luna reuní pa dje forma ei keda tene prensa na altura di e desaroyonan pa ku Karnaval 2019...

Entrega di premio di Karnaval 2018 ta tuma lugá dia 11 di mart 2018...

E intenshon tabata pa hasi esaki riba djasabra, 10 di mart, pero e fecha ta kai pareu ku e final di Kantadó Mayo 2018...

Pa loke ta trata Karnaval di Bándabou nos a risibí invitashon pa djasabra, 3 di mart 2018 ...

Grupo Dushi Aventura ayera tardi a hiba Hensley Martis na su último lugá di sosiegu...

Martis tabata un dje motornan prinsipal pa loke ta trata obra di man di Grupo Dushi Aventura...

Grupo Sembra Speransa ta promé grupo ku a presentá nan trahe pa Marcha di Seú di forma ofisial...

Tin algun otro grupo ku a hasi esaki, pero den un ambiente mas priva i pa miembronan so...

E pelíkula ‘Black Panther’ ta kibrando rèkòrt, pa su di dos siman el a surpasá 700 mion dòler na Merka...

Aki tambe e pelíkula ta halando salanan yen...

“Curaçao Ponton Festival” ta mustra di tei bira un festival ku lo bai hala bon públiko...

Pa kuminsá e desishon di duna un homenahe na Doña Mafalda Miguel ta algu grandi, no solamente pe echo, pero pa pone e konsierto riba Plasa Brion i laga su pueblo bin dun’e e kariño ku semper el a disfrutá di dje...

Nos gran ‘Dama de la Cancion’ lo risibí dia 5 di aprel un tremendo homenahe ku presentashon di Randel Corsen Orchestra, Son de Tikizia di Costa Rica i naturalmente Arnell i su Orkesta...

Mi ta premirá un Plasa Brion, Brùg di Ponton kargá ku públiko pa presensiá e konsierto aki...

By the way pa esnan ku no sa ‘Son de Tikizia’ ta un dje orkestanan ku sa kompaña Ruben Blades durante di su presentashonnan internashonal...

E banda den pasado tabata di bishita aki na Kòrsou i esnan ku a logra di wak nan presentashon di ‘Ole Ole’ serka Fito a keda impreshoná...

Kuater trombon den frònt i un kantante ku tin praktikamente mesun kolo di bos di Ruben Blades...

Morgan Heritage ta un banda di Reggae ku meresé bo atenshon...

Amantenan di músika di Reggae sigur ta na altura di e klase di e banda aki...

‘Me emborachare’ tambe lo tei, e banda ku tin mesun nòmber ku bo korant faborito ‘EXTRA’ ta pendiente tambe pa presentá durante dje promé edishon di ‘Curaçao Ponton Festival’...

Ku e evento aki awor Kòrsou tin sigur tres evento musikal pa aña di mas ku 1 dia ...

International Blueseas Festival, Curaçao Ponton Festival i Curaçao North Sea Jazz Festival...

Anto esaki ta sin konta sobra eventonan ku anualmente ta keda organisá ...

Ofisina di Turismo e siman ku ta bin aki tin un ‘tour’ promoshonal na Aruba pa promové diferente dje aktividatnan ku ta pendiente pa tuma lugá e aña aki...

Nos tei move, te djárason ku Dios ke !...