Un felis djárason pa nos lektornan...

Awe nochi na Aruba lo tin un homenahe pa Jonathan Thiel, Jeon manera e ta konosí pa nos i awor  internashonalmente...

Ayera Jeon a yega Aruba i a keda risibí pa Gobièrnu dje pais...

Loke ta diskushon na Aruba aworakí pa algun medio di komunikashon ta e echo ku si mester a duna Jeon un homenahe manera esun ku e ta pendiente pa risibí aworakí...

Ta di lamentá ku ta mancha e selebrashon ku lo mester tin ku diskushon riba e logro di e artista...

Jeon a logra i esei ta loke tur hende mester apresiá, kada artista lokal ku logra di pega un ‘hit’ mundial ta algu ku bo mester dun’é su mérito pasó no ta fásil pa logra esaki sigur si bo ta bini di un dje tres islanan aki òf ta forma parti di un pais ku tin un poblashon chikí...

E loke ku sigur a kapta atenshon ta e manera kon e kontakto a keda hasí...

No lubidá ku Jeon tin kansion na Papiamentu ku a logra surpasá mas di 1 mion views, tur esaki mester konta na momentu ku bo ta evaluá pa duna e yònkuman aki un homenahe...

Selebrá bida, stòp di tin kritiká riba chin chan un kos...

Ma tende di un artista urbano ku tin vários éksito aworakí ku tin un rider ku yen eksigensia...

Fuera di su pago, mener ta eksigí karchi VIP pa si no ta 10 ta mas hende, alabes nan mester tin akseso ‘backstage’...

Awo, bo ta duna deskuento pa bo presentashon? ...

Ban serio, dikon eksigí dje tantu ei, anto e hendenan ku ta bini kuné no ta forma parti di su show, nan fanátiko ku e ta invitá, pasó no por duna nan otro nòmber...

Nos mester kuminsá evaluá kiko nos ta eksigí komo artista, bo mester keda den márgen di loke ta normal...

E banda di Trinidad ‘KES’ ta hasiendo un kos ku nan éksito ‘Hello’...

Tin dos banda kaba ku a ‘cover’ e kansion i bo por spera ku lo tin mas banda ku lo bai hasi esaki...

‘Hello’ ta dal bon i ta di wak kon kreativo nos músikonan ta pa traha un ‘cover’ dje kansion...

Ya su vershon na Merengue i Ritmo Kombiná ta zonando ...

Un saludo pa e crew di ‘chihuahua’, e doberman pincher i e ‘westpointer’ ku a djòin e grupo djadumingu último...

E gainan aki tabata kla pa kualke momentu a bula den pisina ...

Danki Dios ku mi ta dominá e arte di pone kachó sinta ku ma logra di kita nan hamber di bula den pisina...

Bon shonnan tabata un plaser kompaña boso den otro edishon di ‘Louie Louie’...

E siman aki ta di selebrashon, djabièrnè nos ta kombersá riba esaki...

Felis dia!...