Un felis djabièrnè pa tur nos lektornan...

Nos a yega wikènt aki i ta fin di siman di e kompetensia di Maramentu di Lensu den kuadro di Seú 2018...

Na Aruba e homenahe na Jeon tabata bunita pa e artista...

Loke ta di lamentá ta e diskushonnan ku a lanta relashoná ku e desishon di Gobièrnu pa duna Jeon e homenahe...

E situashon a bira aun mas kayente na momentu ku un dje baluartenan musikal di Aruba, Cesar Olarte a disidí di kuestioná e echo ku nunka no a dun’é ni tampoko otro músikonan manera Robert Jeandor un homenahe pa nan logronan artístiko...

Cesar Olarte a publiká riba retnan sosial su CV artístiko i esaki ta un impreshonante ku vários ‘highlight’...

E tin rason tambe di bisa ku e esküs ku mester duna un artista un homenahe na bida no ta kuadra ‘at all’ den e kaso aki...

E kosnan aki ta hopi laf i mi ta kere ku ta bira masha difísil pa e gobièrnu di Aruba por logra di hasi ‘damage control’ den e kaso aki...

Mi ta duda ku tin chèns pa ‘make good’ den e kaso aki tambe...

‘Louie Louie’ ta duda ku Cesar tin algu kontra di Jeon, e ta kuestioná mas bien e desishon di Gobièrnu...

Jeon, Cesar i Janiro a traha huntu i un dje piesanan ku sigur a kousa impakto ta e komposishon dediká na Hilward Croes, dfm...

Bandanan i algun artista ta den studio di grabashon preparando pa lansa kansionnan nobo pa dje forma ei kuminsá traha pa yena agènda ku presentashon...

Ta parse ku Michael i Pancho a tira sèrbètè den ring...

Sandy lo mester a kue e sèrbètè i ta trahando riba un grupo di Karnaval nobo...

Eksito Sandy, e no ta fásil pa lanta un grupo den e temporada aki...

Awó e gran pregunta, Sandy a sera ERA kaba òf ERA ta para warda riba Sandy promé ku nan aseptá kualke proposishon di un otro grupo di Karnaval?...

2018 bo mester ta kreativo den Farándula lokal pa bo por logra...

Tin algun entertainment band ku mester move pa por keda bibu, e situashon no ta fásil i formashonnan musikal mas chikí tin mas chèns pa por logra...

E fiesta di bolero di Shon Hugo ta mustra di lo bai hala un bon públiko...

Ta basta un par di dia tin sin ku tin un bon fiesta di bolero ku artistanan lokal presentando...

E hendenan di edat meresé aktividat pa nan por asistí, e grupo ta un aktivo ainda i no a disidí di keda sinta den kas warda nan último ko’i kareda yega...

Bon nos tei move, un felis wikènt, disfrutá, sali i dibertí i kòrda ku semper na midí !...