Un bon siman pa tur nos lektornan...

Un fin di siman kargá ku aktividatnan rònt Kòrsou a pèrkurá pa basta hende move...

E show di outo kombiná ku benta di outo na Sambil a atraé masha hopi hende mes...

Nos a komprondé ku benta a bai bon...

Mester remarká si ku algun dje agensianan te ainda tabata ofresé outonan 2017 na benta...

Awor ta ki dia esnan di 2018 ta yega aki pa bende?...

Fundashon Karnaval di Bándabou a sera temporada ku entrega di premio nan e embahadornan di Karnaval di Bándabou i tambe a pone tres persona den spòtlait pa nan aporte na aktividatnan di Karnaval di Bándabou...

Ta di lamentá ku gruponan ku a partisipá na Karnaval di Bándabou no a risibí premiashon...

Un punto importante ta pa e organisashon di Bándabou kuminsá traha for di awor na gruponan di Karnaval pa Bándabou...

For di e gruponan di skol nan mester por logra pa haña partisipashon di algun na e Marcha di Bándabou...

Laga e muchanan di groep 1,2,3 i 4 partisipá na e Karnaval di skol i 5,6, 7 i 8 na Karnaval di Bándabou...

Laga nan usa mesun tema ku ta skohe pa e marcha di djabièrnè...

Boso tin un tremendo ‘farmsystem’ si e skolnan sigui partisipá na e Karnaval di skol di Bándabou...

Fundashon JAG a organisá un Santo Sakrifisio di Misa pa yama danki na Dios pa e temporada eksitoso di Karnaval 2018...

E kompetensia di Maramentu di Lensu ayera tardi na Club Boneriano tabata bon bishitá...

Nos a sinti falta si di partisipashon di mas marado di lensu...

Algun aña atras kada kategoria tabatin komo 10 partisipante, aworakí esaki a baha yega te 4 partisipante, loke sigur ta di lamentá...

E maramentu di lensu ta un arte, anto e kos mas prinsipal, tanten bo ta dobla, drai e tela, wak pa bo no hinka bo modelo ku e feneta...

Nos a drenta e siman di ‘Kantadó Mayó’...

E aña aki si mi no a konta robes tin 79 partisipante...

Presidente di hurado a saka un komunikado kaminda den dje ta partisipá ku lo no bin kambio na e konstelashon musikal di gruponan rítmiko...

A hasi petishon pa ‘keyboard’ por bin aserka, pero esaki no a keda aseptá pa e aña aki...

Te kon leu mester sigui ku modernisashon dje ritmo Seú pa ‘Kantadó Mayó’ ta e gran pregunta...

E hóbennan ke pa esaki habri pa dje forma ei por musikalisá e areglo mas mihó...

E pregunta ta bira si bo no ta pèrdè e parti dje sabor di e músika krioyo na momentu ku bo aseptá pa hinka mas instrumènt òf un keyboard ku por duná bu tur klase di efekto ...

Mañan nos lo publiká e lista dje promé anochi...

Kantadó Mayó su anochinan preliminar ta djamars 6, djárason 7 i djaweps 8 di mart 2018...

Djasabra 10 di mart tin e gran final di Kantadó Mayó...

Te djárason ku Dios ke !...