Un felis djabièrnè na tur nos lektornan...

Awe ta fecha pa selebrashon di e di dos aniversario di ‘Spoonz’...

Archel i su tim a traha duru durante di 2 aña largu pa duna ‘Spoonz’ un lugá importante den e bida nokturno di Kòrsou...

E maneho di ‘Spoonz’ a pèrkurá tambe pa eksistensia di 2 banda, Dejavu i Hype ku kada un riba nan mes ta trahando duru pa konkistá e merkado lokal...

Pabien na henter e tim di Spoonz i hopi 2 aña mas...

Awe nochi durante di nan tradishonal ‘High Heels Happy Hour’ lo tin un selebrashon tur afó ...

Nos a drenta e wikènt di debut di ONE, e banda a prepará i ta kla pa mañan anochi bai duna un presentashon grátis pa pueblo di Kòrsou...

Manera ta konosí e evento lo tuma lugá den Y212 riba Caracasbaaiweg...

Djadumingu awor na beach di Caracasbaai lo tin e di dos edishon di ‘Summer Beach Tour’...

E evento organisá pa e banda VEGA lo konta ku presentashon tambe di ERA i animashon di dj Black...

E evento ta kuminsá for di 11’or di mainta i ta terminá 8’or di anochi...

Ata AMAK a reakshoná riba loke nos a skibi den ‘Louie Louie’ i a manda un karta pa Minister di Hustisia pa reklamá e situashon kaminda tin artistanan internashonal ku ta presentando sin pèrmit na Kòrsou...

E Asosashon mester vigilá e situashon ku wowo di falki, pero na mes momentu mester ta konsiente ku bo mester tin un órgano di kontrol pa ku esaki den bo organisashon...

Mester por konstatá presentashon di artista i tambe ta informá na mes momentu ku si Gobièrnu a duna e artista un pèrmit si òf no...

Pa sali i podisé reklamá algu sin tin prueba di esaki ta pone bo organisashon den duda...

Kon ta ku e komishon di ‘Buitenlandse Artisten’, nan ta reuní ?...

‘Louie Louie’ ta di opinion tambe ku mester tin un espasio pa presentashon di artistanan internashonal riba nos Isla, no por ta asina ku ta hiba e pensamentu ku ta artistanan lokal so tin ku presentá ...

Tin sierto sentronan di dibertishon, laga mi yama nan ‘Cafe’ ku ta organisá ambiente kaminda e músika di nos artistanan lokal no ta kuadra pa e ambiente, e ora ei mester tin chèns pa un artista internashonal por presentá...

Di otro banda, nos artistanan lokal mester traha mas riba nan promoshon pa dje forma ei atraé interes di doñonan òf manehadó di sentronan di dibertishon...

Si bo no yuda promové bo mes, bo ta keda para semper riba asera ta grita ku artistanan lokal no ta haña chèns pa presentá...

Aworakí nos tin artistanan ku ta presentá na Hotèl i na diferente otro lugá kaminda ‘entertainment music’ ta nesesario pa entretené durante di sea un sena òf kualkier otro evento...

Un análisis dje situashon ta nesesario pa dje forma ei por bin klaridat riba e situashon di farándula di Kòrsou...

Segun mi tòg tin basta artista lokal ku ta presentando den diferente lugá di entretenimentu durante di wikènt...

Mi tei move, djaluna mi tei bek... Felis wikènt !.