Nos a yega djárason, e siman ta parti na dos i ‘Louie Louie’ tei ku otro edishon di e kolumna farandulero... 

E promé anochi di Kantadó Mayó a tuma lugá ayera nochi i mester bisa ku públiko a pèrkurá pa bon asistensia...

TCFM a transmití e anochi preliminar, pero nos a komprondé ku e anochi final lo tin kobertura di sigur dos planta di televishon...

Bon presentashon di diferente grupo rítmiko i kantantenan ku a duna bon presentashon...

Awe tin un evento importante pa músiko i artistanan lokal ku ta tuma lugá na Avila Hotel...

Un evento kaminda un organisashon Canades huntu ku AMAK i ofisina di abogado David Kock lo duna informashon relashoná ku ‘royalties’...

E intenshon ta pa den aki 2 pa 3 luna kuminsá kobra medionan di komunikashon i tur otro persona ku hasi uso di produkshonnan musikal di artistanan lokal den un forma komersial e ‘royalty’ ku e artista meresé...

Ya e presentashon a tuma lugá na Aruba i ta pendiente pa esaki tuma lugá na Boneiru tambe...

Na Aruba algun artista lokal a brasa e idea i ta kontentu ku porfin nan ta haña un ‘fair share’ manera nos kolega Tito Lacle di e portal ‘Noticia Cla’ a informá...

Awe tardi tur informashon lo keda kompartí i lo ta interesante pa sa kiko ta e bentaha i naturalmente e desbentaha ora ku bo uni na un proyekto asin’aki...

Ta konosí ku no ta tur medio di komunikashon lo aseptá e proposishon òf medida aki...

Bo por te hasta haña bu ku e situashon ku lo stòp di toka kansion di artista i òf músikonan pa no paga e ‘royalty’...

Medionan di komunikashon lo mester yega tambe na un manera pa por yega na fondo pa paga e montante ku mensualmente lo keda kobrá...

Esaki lo bo mir’é bèk den preis di aviso mas karu i tambe na akuerdonan kaminda e artista i òf músiko ta duna e medio di komunikashon e derechi di por toka su piesa sin ku esaki lo wòrdu kobrá...

Pues un ‘dispensashon’ pa toka piesanan di e artista...

Ban wak kiko e proyekto aki lo por nifiká tambe pa nos artistanan...

Farándula ta kla pará pa un tipo di proyekto manera esaki aworakí? ...

Yen vrum vrum relashon ku re aparishon di Gio Fuertisimo...

Gibi mes a duna un deklarashon i ku esaki ta konfirmá ku e ‘ko’ no ta kla ainda, pues pasenshi...

Nòmber di kantantenan a keda menshoná i tin sigur 2 ku den pasado a yega di indiká kaba ku pa motibu di trabou nan lo no por ta dje aktivo ei mas ku un banda ku ta eksigí pa tur wikènt nan tin presentashon...

Mi tei move, awe ta e di dos anochi di Kantadó Mayó i awe tambe tin yen kantante i gruponan rítmiko ku ta bale la pena pa bo wak nan presentashon...

Te djabièrnè ku Dios ke !.