Un felis djárason...

Ayera ERA a tene un rueda di prensa relashoná ku nan selebrashon di 36 aniversario di e banda...

E konsepto ku nan a presentá pa e fiesta ta tremendo i e animashon musikal di ERA, Gentz i OREO ta mustra di bai bira un tremendo fiesta...

Wak pa bo kumpra bo karchi delantá, pasó nos tin sigur ku esaki ta bai ‘sold out’ fo’i tempran...

Great di a tuma nota ku Minister Martina a tuma e inisiativa pa lanta un komishon di ‘Nightlife’...

Tin basta aktividat riba Kòrsou, pero loke ta importante pa hasi ta rebibá e ambiente nokturno den sentro di siudat...

Ora bo chèk kualke un dje listanan di aktividat ku tin rònt Kòrsou durante di siman bo ta tuma nota ku tòg tin aktividatnan tumando lugá kaminda si bo ke sali tin kaminda pa bai...

Loke no tin ta aktividatnan na hotèlnan lokal ku regularidat i e ambiente den Punda ta ketu ...

Na Otrobanda ta Riffort Village ta e sitio pa aktividatnan den oranan di anochi i e restorantnan riba de Rouvilleweg ku ta atraé públiko...

Handelskade mester bira un lugá kaminda tur anochi ta karga ku públiko ku ta bini pa disfrutá di e ambiente nokturno...

E negoshinan ku tin einan aworakí ta hasiendo nan bèst i den fin di siman bo ta mira ku tin moveshon di públiko...

E uso di Alameda komo lugá pa organisá eventonan kultural tambe a baha...

DMO i Kas di Kultura mester rebibá esaki, meskos te kaso ku SKO riba Plasa Brion...

Mester ta posibel ku mensualmente tin aktividatnan kultural i músika kultural ta keda presentá riba e dos plasanan mas prinsipal di Kòrsou...

Nos a komprondé ku ta pendiente pa otro siman Junior Tecla presentá ku Vibe Nation den Punda riba djaweps anochi durante di ‘Punda Vibes’ ...

Su presentashon lo ta riba Alameda, loke ta kuadra ku e pensamentu ku ‘Louie Louie’ tin...

Den dékada 80 i inisio di dékada 90 tabata usa Plasa Wilhelmina, konosí komo Alameda pa masha hopi eventonan musikal durante di fin di siman...

Awe tin un homenahe pa Furgell Wijngaarden, nos Kantadó Mayó 2018 na Coca Cola...

E echo ku aworakí tin diferente músiko ku interes pa sigui dialogá riba e músika di Seú mester bira un punto kaminda si Fundashon Kultural Seú Kòrsou no ke duna oido na esaki pa Kas di Kultura tuma esaki over i organisá un debate riba e tema aki ku kompositornan, areglistanan i músikonan ...

Huntu por debatí i bin ku proposishon pa e kambionan ku ta deseá pa sigui engrandesé e festival di Kantadó Mayó...

Tin diferente aporte ku a keda duna den e dianan aki riba facebook ku ta bale la pena pa diskutí ariba i yega na puntonan kaminda por hasi adaptashon na e reglanan di kompetensia di e festival ...

Pensa riba dje...

Nos tei move, djabièrnè nos tei bèk ku otro edishon di ‘Louie Louie’...