Un felis djabièrnè pa nos lektornan...

Nos a yega wikènt aki, mañan tin elekshon di Reina Seú ...

No tabatin masha promoshon pa e evento...

Dia di e kompetensia di Maramentu di Lensu a presentá e partisipantenan, pero despues di esei no a tende nada mas dje evento...

Djadumingu awor tin entrega di premio di Karnaval 2018...

E organisashon Fundashon JAG tin karchi na benta pa esnan ku ta interesá pa bai e evento ku ta tuma lugá na Marjorie na ‘Yotin Kòrtá’...

No lubidá ku mañan mainta tin e ‘gimmick’ di ERA pa loke ta trata nan fiesta di selebrashon di 36 aniversario ‘Alegria’...

Bo yega trempan na Licores Maduro, bo tin chèns di kumpra bo karchi entrada pa 36 florin...

E fiesta tin tur ingrediente pa ‘sold out’ fo’i tempran...

Tin algun bon fiesta mas na kaminda ku ta halando atenshon...

Na Boneiru tambe nan no tabatin masha bon palabra despues ku e organisashon ‘Socan’ a tene su presentashon relashoná ku e kobro di ‘Royalties’ dor di artista i músikonan lokal...

E hóben artista Jeon a pone riba Facebook su impreshon di e proyekto ku a keda presentá...

E ta bisa ku komo artista kon bo ta kuminsá djòin un organisashon ku ta bai kobra e hendenan ku tur tempu a sostené abo komo artista lokal...

Esei ta e pensamentu di mayoria di e artistanan, pero tin algun ku si tin e pensamentu ku mester tin un kompensashon pa nan komo artista...

E loke ku ‘Louie Louie’ a premirá fo’i tempran ta bai sosodé, nos ta hopi interesá pa sa ora ku e organisashon aserká radio emisoranan pa sera kontrakt komo representante di e artista i músikonan lokal...

Mi ta duda ku nan lo laga e organisashon pone niun aparato den nan edifisio pa por kontrolá e kantidat di biaha ku kualke kansion ta toka pa despues kobra...

Pió ainda si lo bai kobra pa artistanan internashonal sin ku nan tin representashon lokal...

No ta nada fásil pa bo logra riba tres isla chikí aki...

Pa fin di luna tin International BlueSeas Festival den área di Pietermaai...

Un evento ku lo pèrkurá pa atraé un kantidat grandi di públiko pa e área di Pietermaai...

E evento ku ta produsí pa Fundashon Bon Intenshon meresé di risibí un klase di sosten di e mundu di Horeca ...

Ta eventonan asin’aki ta pèrkurá pa e kalènder di aktividat di Kòrsou ta yen i logra atraé turista for di eksterior...

Su siguiente siman ta Ponton Festival ku tambe tin tur ingrediente pa atraé un variedat di públiko, e meskla perfekto ku bo tin mester pa bo evento...

I no lubidá tambe Curaçao International Film Festival ku tambe ta perkura pa nos risibí atenshon mundial i sigur den e área di Karibe ku e festival di sine...

Tin kosnan bon tumando lugá na Kòrsou ku meresé sosten di nos propio hendenan...

Mi tei move, felis wikènt...