Un bon siman na nos lektornan...

Despues di un temporada ‘fo’i aire’, nos tei bek ku otro edishon di ‘Louie Louie’...

Un wikènt karga ku bon fiesta i yen aktividat kaminda públiko por a asistí i disfrutá...

Nos a drenta e siman di ‘Velas Latinoamerica Curaçao 2018’...

8 barku di bela grandi lo bishita nos haf durante tres dia kaminda públiko lo tin oportunidat di bishita e barkunan i aserka disfrutá di un kantidat di aktividat ku lo tin den haf i riba  diferente wèrf...

Aserka lo tin konsierto durante tres anochi sigui riba Brionplein ku presentashon di Junior Tecla, Marinierskapel ku Izaline Calister i pa sera ‘Velas’ lo tin presentashon di Oscar d’Leon otro siman djamars ...

Djasabra atardi e notisia ku a suspendé presentashon di banda den sigur dos sitio den Pietermaai a lanta basta konmoshon...

Loke ‘Louie Louie’ a ripara mesora ta e hecho ku no a tarda masha ku a bin un splikashon dikon a suspendé e presentashonnan...

E sitionan no tin e pèrmit nesesario pa por laga muzik ‘bibu’ entretené e públiko...

Ayera a bira konosí tambe ku na mas ku 1 okashon a pone doño dje establesimentunan na altura ku mester hasi petishon pa un pèrmit adishonal pa dje forma ei por tin presentashon di muzik ‘bibu’...

‘Louie Louie’ ta di opinion ku ta e doñonan di establesimentu mes a faya i no mester usa e músikonan lokal komo punto di lansa pa un reklamo riba e hecho ku a para nan presentashon...

Pietermaai ta un área ku ta atraé masha hopi públiko den wikènt i sigur ora ku tin presentashon di músikonan lokal...

E área ta sirbi tambe komo sede di International Blueseas Festival, ku den kaso di nan evento ta pidi pèrmit apart debí ku tin presentashon riba kaya...

Ta di lamentá ku e doñonan no ta atené nan mes na regla ...

Nos ta spera ku nan lo por hasi petishon mas pronto ku ta posibel pa músikonan por sigui presentá òf nan lo tin ku hasi petishon apart pa evento kada biaha ku ta bai laga un artista presentá...

Si tin reklamo di loke ta ser yama ‘molèster di zonido’ den e bario, esaki lo mester ta di yu di Kòrsou mes, paso mi ta duda ku ta hulandesnan residensia den e área tin molèster di zonido...

Na un okashon ‘Louie Louie’ mes presente na un konsierto ku a tuma lugá den e kaya a tuma nota kon un dama lokal ku ta biba den e área tabatin masha problema paso a sera e kaya i ku e no por yega su kas ku su outo...

Ban spera no ta e shon ei a skibi karta i awor esaki ta e motibu di e problema...

By the way, e dia ei e shon a rabia, pero e ta un konosí di baidó di aktividatnan kaminda tin bon ambiente i bon músika...

Bon esaki tabata otro edishon di ‘Louie Louie’, un bon siman pa bo i kòrda lanta tur dia ku ánimo pa nos traha riba adelanto di nos Pais...