Un bon siman pa tur nos lektornan...

Kon a bai ku bo wikènt? ...

Mundial di futbòl a yega su final i mesora bo ta bai sinti manera un bashí...

Kuementu di kick riba retnan sosial lo tin ku bai bòltu bira riba kualkier otro tópiko...

Velas Latinoamerika Curaçao 2018 a kuminsá ayera mainta tempran ku entrada di diferente dje barkunan militar ku ta partisipá na e evento di Kòrsou...

Tabata great pa para i mira entrada di e barkunan i tuma nota tambe kuantu hende a bai Punda i Otrobanda pa por presensia esaki...

E sentimentu di kon bunita nos entrada ta i kon bo por organisá un evento manera esun di ayera mainta ta algu di aploudí sigur...

Nos haf ta brinda un oportunidat úniko...

Lo ta interesante pa tende di e tripulantenan di e diferente embarkashonnan kon nan a eksperensiá e entrada ku públiko pará tur dos banda di e bahia ta presensiá nan entrada...

Junior Tecla ku Vibenation a dal bon ayera nochi...

Bon kompañamentu musikal ta loke ku e banda a pèrkurá pe i zonido tabata tremendo...

Naomi Silvanie a impreshoná un biaha mas ayera nochi ku su bunita interpretashon...

Pa awe nochi tin presentashon di Izaline Calister...

Dado kaso bo no ta logra pa yega Brionplein awe nochi bo por sigui e transmishon via di e página di facebook di Extra Curaçao...

Ayera esnan ku a wak e transmishon a disfrutá di un transmishon ku un bunita imágen ...

Parlamentario Gibi Doran a kuestioná e desishon rápido di konseho di Minister pa bin ku un solushon pa e situashon di Pietermaai i ta lubidando riba sobra sitionan di fiesta ku tambe ta den mesun situashon...

Ta manera ‘DEN E BEMBE’ a skibi siman pasa AMAK mester traha riba un kompilashon di problemanan ku ta eksistí na diferente sitio i òf ku lokalidatnan pa loke ta trata problema di molèster di zonido i ku aprobashon di doñonan buska un manera pa intermediá pa Gobièrnu rekonsiderá nan posishon ku kada un dje sitionan...

Mi ta kere ku ta e úniko manera pa trata na yega na un solushon pa e situashon di demas lokalidatnan di Horeca...

Si no tur hende ta sigui papia ku a laga otro sitionan desampará sin buska solushon pa nan...

Algu otro ku ta masha importante, tur hende mester mantené nan mes na lei...

Esaki ta konta pa e área di Pietermaai tambe, pues e situashon no ta solushoná, ta habrí pa yega na un solushon, pero den kuadro di loke lei ta preskribí...

Djárason awor AMAK tin su manifestashon, lo ta interesante pa wak si e organisashon ta bai logra pa presentá un plan na Gobièrnu òf ku nan lo djis manifestá anto pa e siguiente dia nos ta sigui biba bai riba nos dushi Kòrsou...

Ayera nochi Plasa Brion tabata bastante yen, mi ta premirá ku awe nochi i mañan anochi lo atraé mas públiko pa e konsiertonan grátis di Velas...

Un siman fruktífero pa bo!...