Un felis djabièrnè pa tur nos lektornan...

Nos tei bèk ku otro edishon di ‘Louie Louie’...

E tópiko molèster di zonido ta na òrdu di dia...

Via di retnan sosial ma komprondé ku ayera Polis lo mester a stòp un negoshi den Prinsenstraat na Punda pa toka muzik...

E rueda di prensa di Minister Suzy Camelia-Römer i AMAK a kana bon i tur splikashon tabata mas kla ku di dia...

Awor AMAK mester hasi su hùiswèrk bon pa dje forma ei ora ku nan yega e ‘Diálogo Demokrátiko’ nan lo por kombens’é tur hende ku nan ponensianan...

Un kos si tur hende mester tene bon kuenta kuné...

No ta tur biaha ku bo ta pidi pa regulá un situashon ku esaki lo sali na bo fabor...

Ora bai drecha tur kos tin kaminda ku lo bai ‘stret’ nèt e kosnan ku lo hasi praktikamente imposibel pa bo por organisá un evento...

Un ehèmpel i ta loke ku tambe ta un diskushon den eventonan públiko ta e paramentu riba kaya òf e tráfiko ku ta stanka òf keda strobá...

Djis imaginá bu ku si bini ku e eksigensia ku tur evento ku ta keda organisá dilanti di un empresa lo mester keda sera den un kura ku e hèkinan haltu...

Esaki lo trese gastunan adishonal pa e organisadó di un presentashon di un grupo di aguinaldo òf grupo di tambú, loke tin chèns di resultá ku no ta bai kumbiní e snack òf toko pa pone animashon musikal na su empresa...

Si mi no ta faya, tin algun snack òf toko ku ta duna apénas 500 florin pa 1 presentashon i esaki sigur lo no yega pa kubri e gastunan dje evento...

Ban spera ku no yega na e situashon aki...

Velas Latinoamérica Curaçao 2018 a resultá un éksito tantu pa e kantidat di bishitantenan ku e barkunan a risibí komo e konsiertonan ku a tuma lugá riba Brionplein...

Di informashon ku nos a risibí e barku di Portugal, ‘Sagres’ a risibí riba 20 mil bishitante...

Petishon a keda hasí pa risibí informashon di bishitante di tur e barkunan...

Pa loke ta e kantidat di hende ku a bishita e konsiertonan esaki tambe a surpasá espektativa di organisadónan...

Curaçao Sail Foundation ta meresé tur elogio pa e tremendo trabou ku nan a desplegá ku Velas...

Spònsernan ku a kontribuí pa hasi e evento posibel tambe meresé un kòmplimènt...

Ta interesante pa sa kiko un evento asin’aki ta generá na entrada pa Kòrsou...

Un estudio riba esaki mester keda hasi...

Ephrem J, nos bachatero nashonal, pero ku no ta wòrdu alsá na su Pais, ta pendiente pa presentashonnan internashonal atrobe...

Aworakí tin riba agènda presentashon na Hoogstraten, London i tambe na Warsaw, Polonia...

Ta di lamentá ku e no ta pega niun éksito lokalmente pero internashonal nan ta apresi’é na diferente pais...

Nos tei move, disfrutá di bo wikènt, sali i dibertí, pero kòrda hasi esaki na midi...

Felis wikènt !