Un bon siman pa tur nos lektornan...

 Wikènt a bai tremendo, basta moveshon riba kaya i fiestanan ku eksepshon di ayera nochi tabata bon bishitá...

 Tráfiko riba Caracasbaaiweg a pega djasabra anochi ku bo a kere ku ta algu a sosodé pariba, pero di tur dos banda ta basta hende den outo tabata move bai bin pa opservá e moveshon dilanti di diskoteka Y 212...

 E debut di ‘ONE’ tabata tremendo, un bon públiko a asistí na e promé presentashon lokal dje banda...

 E banda a zona bon i nan por mira atras riba un bon presentashon...

 E variashon dje banda ta tene e ambiente bibu sigur i si nan pèrkurá pa durante di nan presentashonnan nan sòru pa e efektonan di lus i video kla ta !...

 ‘Hitz’, e kompania di zonido i efektonan di lus tambe a hasi un bon trabou pa ‘ONE’, Mambi i Quincy, keep up the good work !...

 E ‘Fiesta di Amor’ tabata tremendo, e públiko fanátiko di Doble R i ERA sigur a disfrutá di un bon fiesta na kas di Doble...

 E selebrashon di SPOONZ su di dos aniversario tambe a bai bon...

 Públiko para den rei pendiente pa drenta i gosa den nan diskotèk faborito ku a kumpli 2 aña...

 Pabien na Archel, Briaen, Curt i Anaiz ku e di 2 aniversario di Spoonz...

 Ayera O’Vega a organisá nan Summer Beach Tour na Caracasbaai...

 Basta hende a kue kabes pariba pa wak i disfrutá dje músika di O’Vega i ERA...

 Nos ta pendiente pa tende unda e siguiente presentashon di O’Vega su ‘Summer Beach Tour’ lo tuma lugá...

 Pendiente pa e siman aki, mas tarda otro siman pa Gigo Martinez saka su produkshon musikal nobo...

 Ayera el a laga su siguidónan riba facebook skucha un pida di un di su kansionnan nobo...

 E mes tabata super kontentu i nos ta pendiente awor pa skucha e lansamentu ofisial dje produkshon musikal aki...

 I Tune a lansa dos piesa nobo riba merkado...

Esaki den kuadro di nan presentashon na Ulanda ku lo tuma lugá riba dianan 1,2 i 3 di sèptèmber próksimo...

 Ambos piesa ta zona bon i mi tin sigur ku nan lo pèrkurá pa bolbe lanta espektativa pa ku presentashon di e banda aki na Kòrsou mes...

 Awor ta e fecha aki na Kòrsou mester ta bon pa tur músiko ku ta forma parti dje banda pa e banda por presentá...

 Mayoria di e músikonan tin kompromiso...

 Interpark ayera a tene su bin sera konosí ku e parke di dibertishon ku mañan djamars ta habri di forma ofisial...

 Masha hopi hende a bai e parke. E lugá di parker di Sambil tabata kompletamente yen, tantu pa e wega di futbòl ku a keda transmití den e food court komo pa esnan ku a bai tira un bista na e parke...

 Ma tuma nota ku nan tin loke ta ser yamá na spañó un ‘Montaña Rusa’ basta grandi...

 E ‘roller coaster’ aki lo bai bira sigur un dje atrakshonnan prinsipal di Interpark...

 Nos ta na djaluna, siman a kuminsá pa traha pa hiba nos Pais dilanti, nos ta sigui demostrá ku deporte nos ta skor rònt mundu...

 Djárason ‘Louie Louie’ tei bèk!...