Un bon siman pa tur nos lektornan...

Hopi bon reakshon riba e artíkulo ku a atendé tokante e kantidat di ‘views’ ku EXTRA a logra resientemente durante dje transmishon di ‘Velas’...

E arte ta pa skohe e momentu perfekto pa hasi un transmishon ...

Papiando di Velas, e asistensia na e evento tabata realmente grandi i komentarionan positivo pa ku organisashon dje evento ta yega serka Curaçao Sail Foundation ketu bai...

Molèster di zonido a keda un tópiko di atenshon durante dje siman aki...

‘Yeta Kaweta’ a graba un kombersashon entre su persona i ‘Petra’ kaminda bon kla e ta splika shon Petra ku e mester kustumbrá ku e muzik duru aki na Kòrsou, pasó ‘Petra het kan niet zachter’...

‘Yeta Kaweta’ tin riba 50 mil views ta bai ku e video aki...

Nos ta pendiente pa djasabra awor e promé presentashon dje proyekto ‘The Legends’ ku Juni Juliet, Ompi Stefania, Ñaño Rosario i Mr. Saab...

E kuarteto aki ta presentá den Riffort Village i nos ta sigur ku lo tin hopi hende ku lo yega Riffort pa por disfrutá di nan presentashon...

Karnaval na Ulanda tambe ta den full swing i ta diferente aktividat tin ta tumando lugá, entre otro Festival di Tumba i tambe nos a tuma nota di un jump in...

Djasabra awor ta fecha pa e Marcha di Karnaval den kurason di Rotterdam...

E interes pa e evento aki ta masha haltu mes i aki na Kòrsou tin hopi hende ku ta interesá den e transmishon dje evento pa nan mira konosínan ku ta residensiá na Ulanda ku nan tin masha tempu sin mira...

E tradishonal saludonan di esnan na Ulanda pa famia aki na Kòrsou tampoko no sa hasi falta...

Ma tuma nota ku Hermanito a anunsiá kaba ku lo e tei presente i nos lo keda pendiente pa su videonan ...

Ayera La Perfecta a graba ‘bibu’ i nos ta pendiente pa ora ku nan manda e kansionnan radio...

Nan a graba un cover di  ‘E lugá ku mi meresé’ na montuno i di loke ku nos a tende, e ta zona bon!!!...

E piesa original di Url Isenia i Dan Dan ta un éksito na radionan lokal i riba medionan sosial ...

Nos ta yegando final di luna di yüli i awor tur hende ku sa bai eventonan ta kuminsá prepará pa bai Curaçao North Sea Jazz Festival 2018...

E di 8 edishon tin algun artista grandi na kaminda i pa tur smak tin artista...

‘Louie Louie’ ta bai kuminsá duna algun informashon dje evento ku lo tuma lugá riba 30 i 31 di ougùstùs i 1e di sèptèmber na WTC...

Ta interesante pa sa e aña aki kon e interes ta di eksterior, kambernan di hotèl segun mi a bira ménos, pero tin hopi lugánan konosí komo ‘bed and breakfast’ ku a lanta den e último 2 añanan, podisé esaki lo ta e solushon pa hospedahe...

Nos tei move, un siman fruktífero pa bo, pa sigui produsí pa hiba nos Kòrsou dilanti !...