Un felis djárason pa abo ku ta lesando ‘Louie Louie’...

Tur hende a bai ketu riba e asuntu di ‘molèster di zonido’...

AMAK mester a lanta un komishon pa traha riba nan puntonan pa e ‘Debate Demokrátiko’...

Great e desishon di Curaçao Lions Club pa apuntá Romeo Heije komo e representante di Kòrsou na e festival pa personanan ku deskapasidat visual ku ta tuma lugá dia 28 di yüli na Guatemala...

Pa esnan ku konosé e kansion di Elio Roca ‘Te nesecito tanto Amor’, sa ku ta un kansion ku bo mester ta un señor kantante pa interpretá esaki, anto Romeo ta un kantante ku nos tin sigur ku lo kousa un impakto grandi ku presentashon dje kansion aki...

Ma komprondé ku kada kantante por partisipá ku 2 kansion i e otro ta un komposishon di Ced Ride ku a gana ‘Un Kanto pa Kòrsou’ 2017 titulá ‘Patria Stimá’...

Eksito na Romeo Heije i Ced Ride na Guatemala...

E fasilidatnan di ‘Bed & Breakfast’ ku tin aktualmente rònt Kòrsou lo ta sigur esnan ku ta bai saka benefisio e aña aki ku bishitantenan ku ta bini pa Curaçao North Sea Jazz Festival 2018...

Plaza Hotel, Howard Johnson ku Marriott será ta pone ku e kantidat di kamber a baha drástikamente ...

Papiando di CNSJ, tin algun formashon nobo di Jazz ku a lanta na Kòrsou ku den e próksimo dianan nos lo bai duna atenshon na nan...

Pa esnan amante di músika Jazz òf Latin Jazz ta bale la pena pa presensia e presentashon di algun dje bandanan aki...

Ma komprondé ku tin algun establesimentu ku ya kaba tin nan skedjel di presentashon di músikonan di Jazz ...

Tur esaki pa huntu biba ku e proyekto musikal mas grandi di Kòrsou i sin duda di Karibe...

Tin algun festival grandi pero nan spectrum di músika ta limitá nan mes na dos pa tres género di músika, miéntras Curaçao North Sea Jazz atraves di añanan a pèrkurá pa un variashon amplio di género di músika...

E kantidat di konsiertonan a baha, pero loke ku ta tumando lugá pa loke ta falta di 2018 ta eventonan grandi ku sigur tin nan influensia no solamente riba e públiko lokal pero ku ta atraé tambe turista pa nos isla...

Tuma e ehèmpel di ‘The Flying Dutch Curaçao’ ku ta bai tuma lugá dia 25 òktober próksimo...

E evento tin algun buelo charter ku ta yen kaba na Ulanda...

E spòtlait ku nos ta bai risibí ta algu grandi sigur...

No ta pòrnada ku Ofisina di Turismo ta promoshoná Kòrsou komo e tarima di Karibe pa loke ta trata konsiertonan di kalidat...

Mi ta kere ku si di un forma stratégiko nos plania i ehekutá un kalènder di aktividat na Kòrsou nos lo por atraé mas turista...

Mi no ta pensando riba solamente eventonan musikal, pero kualke otro evento ku tin karakter internashonal ku por pone spòtlait riba Kòrsou...

Un bon maneho den e direkshon aki lo saka su frutanan sigur...

Laga mi bula fo’i polítika...

Nos tei move, djabièrnè nos tei bèk... ‘Louie Louie’...