Un felis djabièrnè pa tur nos lektornan...

Nos ta kla pa mañan mainta 8’or brinda pueblo di Kòrsou i tur ku ta sigui EXTRA via di nos página di facebook ‘extracuracao’ e tremendo Zomercarnaval di Ulanda...

E plataforma digital di EXTRA ta produsí i presentá e popular karnaval di Rotterdam den estrecho koperashon ku Fundashon J.A.G...

Tur aña ta masha hopi hende ta pendiente pa e karnaval di Rotterdam i e aña aki lo no ta un eksepshon...

Mas ku 2500 partisipante lo partisipá den e marcha ku 30 grupo di karnaval i 30 banda i dj...

Segun informashon 20 karosa lo forma parti dje marcha, repartí den e diferente gruponan...

E ekspektativa ta grandi pa mañan djasabra...

Awe nochi ta tuma lugá e tradishonal ‘Battle of the Drums’, otro evento ku ta atraé masha hopi hende mes...

Na Kòrsou djasabra anochi den Riffort Village lo tin e presentashon di Juni Juliet and ‘The Legends’...

E presentashon di Juni, Saab, Ompi i Ñaño tambe tin basta interes pe...

Kòrda bai fo’i tempran pa bo por haña un lugá di parker i sinta pa wak e presentashon...

Ayera ma tuma nota ku e agrupashon musikal ONE a pone 4 piesa ‘bibu’ na disposishon di medionan di komunikashon...

E paso aki ta masha importante pe banda, nan ta produsí, pero no ta risibí e promoshon deseá di radionan...

Awor ta konosí ku tur dj ke toka piesanan ‘bibu’ pa e oyente sinti e sabor dje banda ora nan ta toka ‘bibu’...

Esei ta pone ku ta graba ‘bibu’ i manda radio sperando ku esaki ta yuda e banda ku publisidat i oportunidat pa toka...

Awe nos tin un vershon kòrtiku di ‘LOUIE LOUIE’...

Disfrutá di bo wikènt i mañan mainta tempran ban biba i gosa di Karnaval di Rotterdam...