Un bon siman na tur nos lektornan...

Kòrsou su partisipantenan pa diferente sertámen na República Dominicana e wikènt ku ta tras di lomba a logra di konkistá diferente premio...

Masha pabien na e hóbennan ku a partisipá...

E wikènt ku ta tras di lomba tabata un bon pa farándula...

Pueblo di Kòrsou a sali i dibertí ...

Tabatin evento pa tur tipo di edat i sigur na e evento e konsierto grátis di Juni Juliet & ‘The Legends’ den Riffort Village e públiko, den nan mayoria, riba 40 sigur a disfrutá un bòl...

Ta manera ma skibi den e artíkulo, fo’i ora a anunsiá e proyekto i e fecha di presentashon di djasabra último a bira konosí, bo por a premirá ku Riffort lo a resultá chikí...

Públiko a para tur kaminda, dilanti, den banda i te hasta patras di stage, sin konta esnan ku a bai para den trapi i riba e otro pisonan pa por a mira i disfrutá dje presentashon di nos leyendanan musikal...

E proyekto a resultá un éksito total...

I despues dje presentashon ta hopi hende a kuminsá buska number di telefòn di Juni Juliet ...

Fo’i djasabra anochi ma mira sigur un aserkamentu pa por sigurá fecha di presentashon...

Mi ta kere ku Juni su telefòn for di ayera lo mester ta okupá ku promotornan i òf organisashonnan ku ke reservá fecha pa e último kuartal di 2018...

E repertorio i e manera ku esaki a keda presentá a kai na satisfakshon di tur presente...

Great mira kon e animashon tambe tabata tumando lugá...

Ku eksepshon di algun kaminda ku e banda mester rafiná, mi ta di opinion ku e banda a hasi un tremendo trabou...

Den un tempu kòrtiku bo dominá na mi konteo sigur 24 piesa no ta wega...

Hopi músiko tambe tabata presente pa mira e presentashon di e leyendanan Mr. Saab, Ompi Stefania i Ñaño Rosario...

No mester lubidá tampoko Chofi, Palucho i Juni Juliet kende nan trayektoria musikal ta impreshonante...

Awe na presis 1 luna nos tin e promé anochi di Curaçao North Sea Jazz Festival 2018...

E evento musikal di mas grandi di Kòrsou ku presentashon den e di 8 edishon aki tambe di artistanan ku ta streanan mundial...

Un evento ku ta atraé no solamente públiko lokal, pero ta pèrkurá segun investigashonnan ku a keda hasi un bon kantidat di turista ku huntu ta sòru pa un ‘spin off’ ekonómiko di importansia pa nos pais...

Pa e siman aki ‘Louie Louie’ i ‘DEN E BEMBE’ ta pendiente pa anunsio di un proyekto nobo ku pa djaweps awor ta mira lus di dia...

Mi ta kere ku pa mañan esaki lo keda anunsiá...

Ta pendiente pa otro proyekto di EXTRA Digital ku sigur lo kai na agrado...

Nos tei move, bon siman pa bo. Kòrda ku tur dia nos tin ku lanta ku Fe i Optimismo pa sigui bai padilanti...