Un felis djabièrnè na tur nos lektornan...

Ayera nochi nos tabatin e estreno riba e plataforma digital di EXTRA dje produkshon ‘Na kaminda pa Curaçao North Sea Jazz 2018’...

Lamentablemente debí na un fayo tékniko e estreno dje programa no por a tuma lugá ayera nochi na TeleCuraçao, pero e ta pendiente pa wòrdu pasá  awe nochi despues di ‘Punto Final’ na TeleCuraçao...

Preparativonan pa Curaçao North Sea Jazz Festival ta kanando masha bon mes...

Dos dje spònsernan dje evento e aña aki ta pendiente pa anunsiá nan kampaña...

Licores Maduro ya a kuminsá promoshoná su ‘Jazzy Water’ i ta pendiente pa Heineken tambe anunsiá nan kampaña...

Manrique Capriles ku nan ‘Te Hindú’ tambe tin un kampaña pa gana karchi...

Mañan anochi tin e promé edishon di Kandela Cigar Lounge su ‘Kandela Bourbon Street at North Sea’...

Riba tur djasabra nan lo tin un banda tokando, mañan ta Arnell i su amigunan tei presentá nan músika di Jazz...

Kitamentu di bòrchinan di propaganda sin pèrmit a kuminsá ...

Ma tuma nota di esun di Berg Altena i segun ma komprondé ta pendiente tambe pa esnan pone riba Caracasbaaiweg...

Tur hende mester mantené nan mes na lei...

Si bo ta bai hasi un invershon dje grandi ei pakiko no sigurá esaki dor di pidi un pèrmit...

Si ta un pida plachi multiplex bo ta buta kantu di kaya, òf pegá na un palu di lus di tráfiko i promové bo evento sin pèrmit lo mi por komprondé, ounke e ta kontra di lei...

Pero esun ku ta invertí kumpra material i traha un frame pa un bòrchi elektróniko ku ‘led screen’ si mi no ta mira fo’i unda ba saka e kurashi pa pone esaki anto keda sin reakshoná na momentu ku Gobièrnu bisá bu ku bo tin ku kita esaki...

‘Louie Louie’ a tuma nota ayera ku e artista Ja Rule ta na Kòrsou...

E motibu di su bishita no ta konosí i e rumornan ku lo e tin un presentashon na Kòrsou, parse ku esaki ta infundá...

Lo e por ta un presentashon privá, pero esaki a keda hopi bon skondí pa no tin boradó di fiesta...

‘Louie Louie’ a kombersá ku Paco Nahr, un dje organisadónan di e konsierto riba Freewinds ku e 3 divanan, Geki, Jill i Yentje...

El a keda masha kontentu ku e reakshon di públiko ku a asistí na e konsierto...

Hendenan a pidi pa ripití e konsierto i te hasta e kapitan di Freewinds a indiká na e organisadónan ku mester wak un chèns pa bolbe ripití e konsierto...

Fondonan rekoudá manera ta konosí ta bai pa kumpra instrumènt pa e studiantenan di Kolegio Alejandro Paula por risibí formashon musikal manera mester ta...

‘Louie Louie’ ta bai ku fakansi pa 2 siman...

Nos siguiente edishon lo ta djaluna 20 di ougùstùs...

Disfrutá di bo wikènt, sali dibertí na midi...

Nos ta topa mañan anochi na Kandela Cigar Lounge...