Un bon siman na nos lektornan...

Despues di algun siman di ousensia ‘Louie Louie’ tei bèk...

Kon a bai ku bo wikènt? ...

Basta moveshon durante dje wikènt ku ta tras di lomba...

Djabièrnè nos a presensiá e presentashon masha animá di e 6 kandidatanan ku ta bai partisipá na e sertámen di Curaçao Beauty Pageant ku lo skohe e representantenan di Kòrsou pa Miss Universe, Miss World i Miss International...

Ma tuma nota di 6 bon kandidata ku sigur lo pone ku e evento lo lusi...

Keda pendiente pa Miss Playa i otro aktividatnan relashoná ku e sertámen di Curaçao Beauty Pageant...

Djasabra a tuma lugá e diálogo demokrátiko relashoná ku ‘Molèster di Zonido’...

For di reportahenan mi por a tuma nota ku e evento tabata bon organisá...

Tin kuater punto di akshon ku e Ministerio tin ku kaba di drecha den un proposishon pa Gobièrnu tuma un desishon riba dje...

Den e puntonan di akshon ma sinti falta di un proposishon pa evaluá e lugánan ku a sera i ku ta disponibel ainda pa yega na un pèrmit pa por reevaluá esaki...

Mi no sa si a diskutí e punto aki i si podisé lo a proponé pa doño di e sitionan aki hasi un petishon di nobo pa esaki keda aprobá konforme e stipulashonnan nobo ku lo bini pa Hinder-verordening...

Djasabra anochi mi tabatin e honor di ta invitado na un selebrashon di kasamentu di Michael i Charra...

For di aki pabien un biaha mas na e pareha i ku e biahe riba e boto matrimonial lo ta un di hopi goso i rekuerdonan fabuloso...

Dreams a toka huntu ku 2 dj, entre nan RO-1, mester bisa ku nan a pèrkurá pa un tremendo ambiente...

Un dje momentunan mas great dje anochi tabata momentu ku ‘Michael Long’ a subi tarima pa kanta pa su amor...

Bon ambiente mes i e klímaks dje anochi tabata Brian Dekkers ku ‘Ata e bala bai’...

Hopi selebrashon di kasamentu tin un ambiente strak, pero esaki tabata bon lòs ku tremendo ambiente bou dje invitadonan...

Awe nochi den ‘Na kaminda pa Curaçao North Sea Jazz 2018’ na TeleCuraçao nos lo tin un entrevista ku Sr. Hugo Clarinda, direktor interino di Ofisina di Turismo ...

No pèrdè esaki, pa 7’or di anochi e vershon pa Facebook lo ta riba e página di facebook di EXTRA ku ta Extra Curaçao...

Si no bo tin chèns pa wak e via di Facebook,  despues di ‘Punto Final’ na TeleCuraçao bo tin e oportunidat di disfrutá dje edishon di ‘Na Kaminda pa Curaçao North Sea Jazz 2018’...

Ora bo analisá e programa di CNSJ bo ta yega na e konklushon ku nos tin un bon line-up e aña aki...

E variedat ta pa tantu hóbennan komo e hendenan grandi ku tur aña ta e ardu prinsipal dje evento...

Bon artista pa tur género i amante di músika...

I loke ta mas great ta e echo ku e artistanan no ta krusa otro durante nan presentashon, pues e ta duná bu chèns di bishitá praktikamente tur artista su presentashon...

Nos tei move, un siman nobo ku yen di posibilidat pa nos kada un, ban sigui traha pa adelanto di nos Pais !...