Un felis djabièrnè pa tur nos lektornan...

Ayera ‘Icons by Gio’ a keda presentá ofisialmente despues di un temporada basta largu di spekulashon...

E vibrashon ku nos a sinti den e banda ayera ta un positivo...

Tur hende ta ku nanishi den mesun direkshon i esaki sigur lo tin un influensia positivo pa e promé temporada di e banda...

Nan tin ku kaba di regla nan sekshon di brass ku manera nos a indiká den e artíkulo lo ta forma pa 2 trompetista i 2 trombonista...

Ayera Verney a indiká ku Amos i Djuric sigur lo ta den Festival di Tumba i ku e banda tin un lista di kantantenan ku lo ke partisipá ku e banda den Festival di Tumba 2019...

Grupo di Karnaval ‘Alo Loco’ tambe a mira lus di dia...

E soño di Chino a bira un realidat i nan ta trahando duru pa logra un tremendo presentashon pa Karnaval 2019...

Nan tin konfirmá ku tur kantante di Icons ta keda huntu ku nan riba tur 2 dia di Marcha di Karnaval...

Esei sigur lo bira un punto di benta pa ku e partisipashon di karnavalistanan ku e grupo...

Pa otro siman ora ku e wèpsait dje grupo keda lansa lo bo tin chèns di risibí mas informashon di e grupo i spesialmente fecha kaminda lo tin presentashon di trahe...

E evento ‘Kaya Kaya’ ku ta bai tuma lugá mañan atardi pa anochi den Ferdinandstraat na Otrobanda ta halando su atenshon...

Basta komentario di hendenan ku a lanta den Otrobanda, sigur Ser’i Otrobanda ku no ta bibando den e bario mas ku ta pendiente pa bishita e evento ku ta ser katalogá komo un ‘Street Party’...

Mañan ta fecha tambe pa e sertámen di ‘Miss Elegansia’ den kuadro di e sertámen di Curaçao Beauty Pageant...

E evento ta tuma lugá na Renaissance Hotel...

E alumnonan di MIL ta pendiente pa mañan anochi bolbe presentá e obra ‘MIL Show 2018: Laga Bai’...

E show ta tuma lugá den Teatro Luna Blou na Zona Kultural di 7 or pa 10 or di anochi...

Karchi nan pa e evento ta optenibel na MIL i si sobra lo tin karchi na porta...

Kontribuí ku e hóbennan i bai disfrutá di un tremendo show humorístiko i edukativo...

Pabien na músikonan ku selebrashon di 50 aniversario di AMAK...

E organisashon ta pendiente pa algun aktividat di selebrashon...

Awe nochi na Plasa Himno i Bandera na Barber tin tremendo antesala di Curaçao North Sea Jazz ku presentashon di Enrico Henriquez i su kuarteto...

Fo’i 8 or di anochi e aktividat ta kuminsá i ta plania pa kaba 11 or...

Djamars awor tin oportunidat pa mayornan i hóbennan por asistí na un demostrashon di lès di muzik na Sambil...

E demostrashon ta tuma lugá den e ‘foodcourt’ di Sambil entre 6 or di atardi pa 8 or di anochi...

Nos a yega na final di otro edishon di ‘Louie Louie’...

Disfrutá di bo wikènt, sali dibertí i pèrkurá pa un bon komportashon...

Djaluna nos tei bèk ku otro ‘Louie Louie’...