Un felis djárason pa tur nos lektornan...

Trabounan ta avansando na WTC kaminda e di 8 edishon di Curaçao North Sea Jazz ta bai tuma lugá...

Ayera nos a bolbe bishita e área pa grabashon di e penúltimo programa di ‘Na kaminda pa CNSJ 2018’ i mester bisa ku trabounan ta basta leu...

Awe den e programa nos lo tin e ‘golf cart edition’, un edishon kaminda ku nos ta rekoré henter e área dje festival huntu ku Manchi Harms i lo hiba un kombersashon ku sr. Tony Halabi, direktor di ‘The Trader Party Service’, kompania enkargá ku benta di kuminda i bebida...

Awe nochi, despues di ‘Punto Final’ na TeleCuraçao e edishon aki di ‘Na Kaminda pa Curaçao North Sea Jazz’ lo bai den aire...

I for di 7’or di anochi bo por mira e vershon spesial pa facebook riba e página Extra Curaçao...

Ya bo ta kuminsá sinti e ambiente pa e festival i nos ta pendiente pa mañan e promé anochi dje festival...

E edishon spesial di EXTRA ku a keda publiká ayera huntu ku e korant a resultá un éksito kompletu...

Bon komentario di e edishon ta loke ku nos a risibí, un trabou di e tim di EXTRA pa abo nos lektor keda bon informá di tur detaye i artista dje festival...

Sujen Felicia a resultá e ganadó di e pakete di karchi pa CNSJF...

Awe tardi e ganadó ku ayera nochi ora ku a notifik’é ku ta e ta e ganadó a bira rékete kontentu lo risibié su pakete di karchi...

Entrante awe e artistanan ta kuminsá yega Kòrsou...

Di informashon ku ‘Louie Louie’ a logra di optené ta indiká ku tin algun dje artistanan ei ta biniendo Kòrsou ku nan famia i ta probechá pa pasa algun dia di fakansi aki na Kòrsou...

Den pasado nos por kòrda entre otro e ‘post’ di Alicia Keys su yu riba beach di Baoase sintá ku indirektamente ta yuda promové turismo pa Kòrsou...

Sin lubidá e ‘Happy Birthday’ di Stevie Wonder pa su yu i Beyonce...

Asina nos por sigui menshoná momentunan úniko ku e festival a laga nos sera konosí kuné...

‘Louie Louie’ a tende di un situashon kaminda un empresa a kue kaminda di hues pa bai buska derechi di kobra loke nan ta yama derechi di porsentahe di benta for di un otro empresa...

E kaso aki ta bira mas serio na momentu ku ta resultá ku e kaso ta riba mas ku 1 mion di florin di supuesto debe atrasá...

Lo bai bira interesante pa sa kiko e resultado dje kaso aki lo ta, paso si esaki resultá na fabor di esun ku a entamá e kaso lo e nifiká ku e otro empresa di horeca lo mester deklará su mes fayit ...

Ban spera ku e empresa di horeca a kumpli ku su parti i ku e loke ta ser spekulá ku e debe no ta kuadra ku realidat...

Nos tei move! Djabièrnè nos tei bèk...