Un felis djárason na nos lektornan...

Impreshoná ainda pa e tremendo wikènt ku ta tras di lomba...

Ta interesante pa sa e aña aki si lo tin un investigashon pa mira e spin off ekonómiko di CNSJF...

Nos mester keda evaluá e festival pa mira unda por sigui fortifiká e promoshon turístiko pa e festival...

Ma mira algun hende ku tabata hasi enkuesta pa CTB durante dje anochi di e festival...

Ku e artistanan mes ku a presentá ta keda impreshoná pa e evento ya ta bisa basta di loke ta keda organisá pa Fundashon Bon Intenshon i MOJO...

E afterparty na wikènthùis di Hershel Rosario e aña aki a bolbe resultá un éksito kompletu...

Nan a logra di atraé algun músiko internashonal ku a asistí na e ‘jam session’ di músikonan lokal...

Great pa mira e videonan ku ta keda kompartí i e ambiente ku tin durante dje enkuentro musikal spontáneo aki...

Ma tuma nota ku e kantantenan di Icons by Gio a biaha pa Los Angeles, California...

Na mes momentu mi ta tumando nota tambe ku tin músikonan dje banda ku ta den studio di grabashon serka Michael B...

E anunsio di Ilan Chester su presentashon na Kòrsou a sòru pa un bon reakshon di su fanátikonan...

E konsierto ta planiá pa fin di novèmber 2018...

Aworakí e plan promoshonal di ‘The Flying Dutch’ mester aktivá pa tur e amantenan di ‘Electronic Dance Music’ prepará pa e festival grandi aki...

Ma komprondé ku no ta henter e parkeerplaats di Lions Dive i Mambo Boulevard ta bai wòrdu usá...

E parti pabou dje rotònde lo bira VIP parking...

Un kos ta sigur, e parti pariba ei ta basta grandi i nos ta premirá ku e konsierto aki lo ta kargá ku públiko...

Tin algun evento mas na kaminda i te hasta nos a tende e nòmber di Gilberto Sta Rosa menshoná komo un dje artistanan ku tin posibilidat di presentá na Kòrsou promé ku fin di aña...

Great pa tuma nota kon nos artistanan riba 60 aña i residensia na Ulanda ta partisipando den ‘The Voice Senior’...

Nan promé presentashon a kousa impakto...

Awe nos ta pendiente pa e anunsio di AMAK pa loke ta trata e konsierto ‘Nos rais Musikal’...

Awe tardi nan lo tene un konferensia di prensa na Sambil...

Presentashon di trahenan di gruponan di Karnaval tei sigui awe ta toka turno na ‘La Vie’...

Nan presentashon di trahe lo ta na Gartish i ku animashon di ERA...

Pa otro siman ma tuma nota di ‘E he he’ di Sandy Atimadora i su tim...

Djabièrnè awor tin e tradishonal ‘Barbekiú’ di Crazy Diamonds na ofisina di BAB na Emmastad...

Si bo no a kumpra bo karchi ainda, bo por aserká un dje miembronan dje grupo òf pasa djabièrnè atardi for di 5’or te ku 9’or i kumpra bo karchi pa 20 florin i risibí un sukulento plato di barbekiú...

Nos tei move, djabièrnè nos tei bèk ku otro edishon di ‘Louie Louie’...