Un felis djabièrnè...

Ayera nochi Grupo di Karnaval ‘La Vie’ a presentá nan trahenan pa Karnaval 2019...

Super bon ambiente den kura di Gartish ku animashon di ERA...

E grupo a konosé un kresementu na miembronan i esaki sin duda ta relashoná ku nan presentashon durante di Karnaval 2018 i awor ku animashon di ERA...

E konsierto ku AMAK tin na kaminda ‘Un regalo di AMAK na pueblo di Kòrsou’ ta un tremendo idea pa konserva nos músika lokal...

Tipo di produkshonnan asin’aki tin ku sigui tuma lugá i na un manera kordiná pa na un manera struktura renobá nos kansionnan popular di pasado...

Awor mi ta bolbe kòrda riba Juni Juliet ku ta un dje músikonan ku ta para tras dje idea pa nos historia musikal bai skol komo materia...

No ta e historia musikal so mester bai, pero historia di Pais Kòrsou mester risibí mas atenshon ...

Patriotismo i Nation Building ta kuminsá ora ku bo ta dominá historia di bo pais i bo konosé bo baluartenan...

Djadumingu awor tin e sertámen final di Curaçao Beauty Pageant 2018...

Nos ta deseá tur 6 kandidata tur klase di éksito den e sertámen...

E front di Icons by Gio ta na Merka aktualmente kaminda ku nan ta trahando riba nan promé produkshon musikal ku segun nos a komprondé lo mester sirbi komo material promoshonal pa e banda promé ku nan debutá dia 3 di novèmber próksimo...

Potrètnan durante di grabashon riba retnan sosial ta duna un impreshon ku Ivanhoe Willems ta esun enkargá ku e parti di produkshon musikal...

Aki na Kòrsou tabatin músiko ku a drenta studio i a graba material pa e produkshon ku ta keda produsí na Los Angeles, Merka ...

Awe ‘The Voice Senior’ ta kontinuá na Ulanda. Tur klase di éksito na e kantantenan lokal ku ta den e kompetensia...

Awe di 5 or di atardi pa 9 or di anochi e grupo di Karnaval Crazy Diamonds tin nan tradishonal ‘BBQ’ riba parkeerplaats di BAB na Emmastad...

Ku bo kontribushon di 20 florin bo ta risibí un tremendo plato di barbekiú ku tres karni i te hasta un ko’i bebe aserka...

Siman di Kultura ta di 23 pa 30 di sèptèmber...

Ban biba nos Kultura, Kultura ta e motor pa desaroyo...

Manera Kas di Kultura ta promové e evento...

“Hasi Grandi nos kultura i halsa nos nashon, paso kultura ta hasi bida mas bunita” …

Mi ta sita un pasashi den un komunikado di Gobièrnu ku ta masha interesante pa bo analisá:

“ Kultura ta un di e pilánan esensial pa konstruí nos nashon (‘nation building’)…

Ta di importansia pa nos fortifiká nos propio identidat i balornan propio, poniendo énfasis riba nos historia i kultura…

Ora nos konosé nos historia i kultura, nos ta deskubrí nos potensia komo un nashon i por skohe konsientemente pa e lokual ku ta hasi nos fuerte…

Di e forma aki huntu nos ta realisá e nashon ku nos ta deseá” …

Un felis wikènt pa bo, ban traha riba nos ‘nation building’ pa hiba nos pais dilanti…