Un felis djárason pa tur nos lektornan...

Nos a parti e siman na dos ...

Ayera tardi nos a djòin e organisashon di Sterck Events durante di nan rueda di prensa...

E hendenan aki ta trahando duru pa logra ku e promé edishon di ‘The Flying Dutch Curaçao’ lo bira un éksito kompletu...

Tin hopi interes for di Ulanda. Te na e momentunan aki 85% di karchinan bendí online a keda kumpra na Ulanda...

Esaki ta un indikashon ku e kantidat di públiko ku lo bini for di Ulanda pa e siman ei lo ta bastante grandi...

Ofisina di Turismo a duna su aporte na e evento aki i for di awor por bisa ku e konsierto aki lo pèrkurá pa un tremendo ‘spin off’ ekonómiko pa Kòrsou...

Interes for di Colombia i Sürnam tambe ta basta haltu i mañan djaweps e organisadónan lo ta na Aruba pa tene un rueda di prensa ayanan...

Tanten nan ta bai Aruba, aki na Kòrsou lo tin un delegashon di e evento ‘Island Takeover’ di Aruba pa bin duna detaye di nan konsierto i aktividatnan ku lo tuma lugá di 1 pa 4 di novèmber próksimo...

‘Island Takeover’ lo konta ku presentashon di entre otro J Balvin, Bad Bunny, Alex Sensation i Jeon...

Lo tin beachparty, pool party i konsierto, pues kuater dia di ambiente na Aruba...

Despues di a despedí, spekulashon i un flyer di promoshon ku a sali na kuminsamentu di siman, ayera Dolce a informá su fanátikonan ku Remy Joss a pasa pa forma parti dje banda di entertainment...

Ensayo di ‘Icons by Gio’ a kuminsá meskos ku trabounan relashoná ku grabashon di nan kansionnan promoshonal...

Papiando di studio di grabashon, e agrupashon musikal Tune a pone un piesa riba merkado...

‘Loke mi mester’ ta keda kanta pa Tico Libiee i ta un piesa ku sigur ta trese bek e sabor apart di toka ku Tune ta konosí pe...

Próksimamente e banda ta pendiente pa un presentashon ku ERA ku mester bisa tin masha bon interes pa e fiesta aki...

Ephrem J ta pendiente pa promé ku fin di luna lansa su próksimo albùm aki na Kòrsou...

E lansamentu internashonal lo tuma lugá riba 1 di òktober próksimo...

E kantante ta entusiasmá ku su proyekto musikal nobo ku tin tur ingrediente pa sigui yud’e ku su proyekshon internashonal...

E ta pendiente tambe pa un konsierto lokal pa ofresé su pueblo e oportunidat pa mir’e presentá ku su orkesta...

Ephrem J ta un artista lokal ku a keda supestimá, pero ku awor tur hende ta siguiendo ku atenshon debí ku ela kuminsá ta atraé hopi atenshon internashonal...

Bon tabata un plaser pa kompañá bu awe ku otro edishon di ‘Louie Louie’ te djabièrnè ku Dios ke...