Un felis djabièrnè pa nos lektornan...

Ounke ku Karnaval 2019 ta te den fin di febrüari kuminsamentu di mart 2019, tin yen grupo ku ta moviendo riba spit...

Ayera nochi ma tuma nota di dos grupo ku tin presentashon di trahe riba mesun dia...

Mi ta kere ta mihó 1 di nan kambia fecha, pasó ta tur 2 grupo lo bai atraé masha hopi hende na nan presentashon...

Sobrá gruponan kuminsá wak ki dia ta sobra pa presentashon di trahe...

Te ainda, trahenan ta mustra nèchi...

Ma tende di grupo ku a bai adaptá trahe te ku ‘headpiece’ nobo a keda presentá...

Tin 1 grupo tambe ku ta riba standby pa presentá trahe, pasó kolónan ta parse un otro grupo!...

Sandy Atimadora i e tim di Grupo E He He tin inskripshon mañan djasabra i djadumingu...

Tin 1 grupo nobo pa Marcha di Tiner, e grupo “Le plaisir D’Life” tin nan presentashon di trahe djadumingu awor den Riffort Village...

Mañan djasabra tin ‘Dia habrí Musikal’ na CCC, Sentro Kultural Kòrsou su Akademia di Músika Edgar Palm...

Nos tin basta un par di aktividat i shownan na kaminda den e último tres lunanan di 2018...

Promotornan ta manera nan si ta kere ku e pueblo ta bai sali kas pa distraí...

Ta importante pa maske kon fèrfelu e situashon ta, pa bo tin oportunidat pa por distraí i baha stress...

Loke ma tuma nota ta ku tin aktividat pa tur edat, fo’i Monster Truck, Ilan Chester te hasta show ku Oscar Harris...

Anto esaki sin konta eventonan manera ‘The Flying Dutch’ ku ta pendiente pa atraé un kantidat di turista pa nos isla...

Djadumingu IBFF ta instalá su 6 prinsesitanan pa ‘Mini Beauty International 2018’...

IBFF lo korona Dailin Viera komo e representante di Kòrsou na Reina Hispanoamerica 2018...

Ana Clara Jansen tambe lo ser korona i lo representá Kòrsou na e sertámen di Miss Teen International H2O Ambassador na lugá di Nicole Alexander ku pa motibu di skol no por kumpli ku e tarea...

‘Kosecha Kultural’ tambe ta mustra di bai bira un evento ku lo atraé un bon públiko otro siman na Landhuis Bloemhof...

Djadumingu awor ta fecha tambe pa ‘Un atardi Tibiri Tabara’ ku Karimbo den Hòfi di Sentro Kultural Kòrsou...

Bon fiesta estilo piknik i ku kantantenan ku kada un riba nan mes lo sòru pa dansflur ta yen...

E repertorio ku piesanan klásiko ya kaba ta indikashon ku e atardi aki lo bira un di kita sombré...

Ba mir’ei tin basta kaminda pa bai e wikènt aki...

Kòrsou tin ‘nightlife’ ta sali bo mester sali kas i bo ta enkontrá un lugá perfekto pa bo sinta relahá i disfrutá di sea un bon plato òf presentashon di nos artistanan lokal...

Felis wikènt!