Un bon siman pa tur nos lektornan...

Siman di Kultura a kuminsá i mester bisa ku e evento riba Plasa Brion organisá pa Kas di Kultura a keda bon bishitá...

Loke sigur ta di aploudí ta e transmishon di TeleCuraçao kaminda esnan ku no por a asistí na evento por a mira esaki via televishon...

Un opservashon si nos tin, mester a publiká e kalènder di aktividatnan mas tempran...

Medionan sosial ta hasi e bida fásil, pero si bo no tin un grupo grandi di siguidó, no ta fásil pa bo promové un aktividat kultural dje grandura aki dje forma ei...

E echo ku ayera nochi diferente agrupashon musikal a risibí e oportunidat di por a presentá durante dje apertura di Siman di Kultura ta sigur algu tambe ku mester aploudí...

Mester organisá mas evento, no nesesariamente relashoná ku Siman di Kultura, pero kaminda ta duna oportunidat pa gruponan kultural presentá riba Plasa Brion i Alameda den Punda...

Dje forma ei bo ta sigui traha riba patriotismo di bo pais...

Sikiera 1 biaha den luna mester hasi posibel pa nos músikonan lokal por presentá...

Mester yega na un fórmula kaminda kada luna ta un empresa lokal ta kubri e gastunan di presentashon, pues sòru pa instalashon di instrumènt, lus, toilet públiko i Kas di Kultura ta sòru pa organisá esaki...

Mi ta kere ku nos mester por logra esaki, e no ta sali segun mi mas ku 2500 florin pa logra organisá esaki...

Miéntras tantu e kalènder a bira konosí i nos ta spera ku tur e eventonan risibí e atenshon ku nan meresé...

Oktober, Novèmber i Desèmber mester ta lunanan kaminda ku nos ta trese un tiki ambiente den kaya sigur den wikènt...

‘Kosecha Kultural’ tambe a saka su kalènder pa e dos dianan, ta masha hopi kos mes lo tin riba e dos dianan pa e fin di siman benidero...

Grupo Oriri ku tremendo presentashon durante di apertura di Siman di Kultura...

Nan a pèrkurá pa tremendo animashon i sigur e lo dal bon...

Nos a mira presentashon di Reinier Lijfrock huntu ku nan i e agrupashon rítmiko a zona super ...

Bon públiko riba Plasa Brion i Dolce a pèrkurá pa e animashon final pa e evento di apertura di Siman di Kultura...

Otro evento ku a tuma lugá ayera i ku a kapta atenshon ta e presentashon dje konsepto di 2 banda nobo na Blue Bay...

‘Pure, The Tour’ i ‘Pure Muse.ic’ a keda presentá i kada un lo tin nan spesialidat i a keda ofresé na restorant i otro negoshinan lokal kaminda muzik ta forma parti dje ambiente...

E presentashon estilo di ‘showcase’ a sòru pa delaster un hende a keda enkantá ku e konsepto ku a keda presentá...

Nos tei move, bon siman !.