Nos a yega djárason i ta kòrta e siman na dos...

Djaluna den e último edishon di ‘Kabe’i Boto’ bo por a sigui e entrevistanan ku e front di Icons by Gio i na final dje programa e videoclip ku a keda grabá pa promové nan promé kansion ‘Mira nos basilá’...

Icons by Gio ku tremendo produkshon, un videoclip bon hinká den otro ...

Selwyn ‘two thumbs up’ pa e produkshon dje videoclip ...

Tur hende ta pendiente awó pa dia 3 di novèmber e fecha pa nan debut...

‘Mira nos ta basilá!’...

Siman di Kultura tin tur hende den gara, e siman aki ta komementu di kos dushi i nos platonan krioyo...

Ta manera un konosí a bisa mi, djadumingu awor e ta subi pa wak kiko ta e resultado di un siman sin tene diet, un siman di disfrutá di tur e platonan ekskisito di nos kushina krioyo...

Manera nos a indiká siman pasá e kantidat di evento ku tin pendiente den e rekta final di 2018 ta impreshonante...

Awó ma komprondé ku atrobe tin situashon di dos artista presentando den mesun wikènt i ku tur dos ta di mesun género di muzik...

Antes esaki no tabata posibel, pero despues e maneho a manera bira un di laga tur hende purba nan suerte...

Mester duna esun ku a entregá su petishon di pèrmit promé si e derechi pa organisá su evento i no ora ku esaki bira konosí ku un otro promotor òf organisashon ta lanta organisá un evento pa blòkia e promé...

Ban wak kon tei para ku e promotor ku ayera a aserka nos ku e komentario dje situashon ku a presentá...

Ta interesante pa wak tambe kiko Gobièrnu ta bai hasi ku petishon pa presentashon di artistanan internashonal den luna di desèmber ...

Mester tuma desishon for di aworakí òf hasi esaki konosí ya tur hende sa na kiko nan tin ku atené nan mes na dje...

Mihó tempran ku warda pa den novèmber anunsiá un desishon kaminda promotornan pa e tempu aki ya a aserka i te hasta ‘book’ nan artista pa nan evento...

Coney Island, Monster Truck i diferente otro aktividat pa públiko general tambe ta pendiente pa tuma lugá...

Ounke kon e situashon finansiero ta, promotornan ta sigui ku nan produkshonnan pa dje forma ei pèrkurá pa e pueblo tin kaminda pa bai...

Esaki sigur mester ta algu di aploudí i te hasta un motibu pa Gobièrnu pensa pa duna un insentivo na e promotornan aki...

Djadumingu awó ta Estreno Mas Pikete su presentashon di trahe di Karnaval pa 2019...

Aña pasá nan a logra di yena Riffort Village ku nan presentashon di trahe, e aña aki tin tur indikashon ku esaki lo ta e kaso atrobe...

Nos tei move, awe tin 2 konferensia di prensa ku anunsio di 2 aktividat, un anochi di ‘stand-up’ comedy i un fiesta ku tres kompositor ku un sin fin di éksito riba nan nòmber...

Lesa ‘DEN E BEMBE’ mañan mainta pa bo keda informá...

Te djabièrnè ku Dios ke !...