Un bon siman pa tur nos lektornan...

Dje forma aki nos a drenta luna di òktober...

No ta wega, 2018 a drenta su último kurva...

‘Kosecha Kultural’ a resultá un éksito kompletu pa e organisadónan...

Bon organisá i ku tremendo presentashon di nos artistanan lokal...

No solamente músika, pero nos tin artistanan na nivel internashonal pa loke ta trata arte tambe...

Great ku nan a invitá gruponan musikal for di Aruba i Boneiru pa presentashon aki na Kòrsou...

Spera ora ku e evento ta keda organisá riba e otro islanan lo invitá agrupashonnan musikal di Kòrsou tambe pa partisipá...

Un saludo pa Alan Maduro ku a disfrutá di e presentashon di Etty Toppenberg i konhunto ku a bini for di Aruba pa presentá...

Ayera tabata fecha tambe pa inskripshon pa Festival di Tumba hubenil i elekshon di embahadornan di Karnaval 2019...

E inskripshon a tuma lugá na Festival Center i nan a krea henter un ambiente ku esaki...

Estreno Mas Pikete tabatin su presentashon di trahe ayera nochi na Riffort Village...

Meskos ku aña pasá nan a bolbe yega Riffort ‘de bote en bote’...

2019 nan ta bai bou di laman i presentashon di trahe tabata bon hinká den otro ku músika di Dreams ...

Loke ta di lamentá ta e ‘diss’ ku tin entre miembronan di diferente gruponan di Karnaval riba retnan sosial...

Yen opservashon i krítika durante di presentashon di trahenan ku ta keda transmití via ‘streaming’...

Tur grupo ta traha riba konsepto di nan trahe i ta skohe e kolónan ku nan ke usa pa nan trahe...

Awor por resultá ku nos tur ta usando un kantidat di koló ku ta similar na otro, pero esei no ta nifiká ku nos ta kopia di otro, No!...

Bo mester ta kreativo i laga bo fantasia traha ora bo ta traha un konsepto di trahe...

Nos tur por usa podisé e mesun kolónan pero e trahe no ta parse otro ‘at all’...

Dikon nos ta kritiká otro, esei te kos ku mi no ta kaba di komprondé...

Karnaval ta goso, Karnaval ta fantasia, Karnaval ta kreatividat, Karnaval ta lòs laga bai...

Pa e siman aki ta toka turno na Dushi Aventura pa presentá nan trahe djaweps awor durante di Punda Vibes riba Gomezplein...

Rhyddm lo ta enkargá ku animashon musikal...

Ta un show kompletu Dushi Aventura tin djaweps, yega tempran...

Djasabra ta toka turno na ‘Bliss’ pa presentá nan trahe ku músika di ONE ku lo ta un biaha mas nan banda pa Gran Marcha ...

Presentashon dje trahe di ‘Bliss’ ta tuma lugá na Acoya...

Nos tei move, otro siman a kuminsá i nos tei sigui traha pa adelanto di Kòrsou...