Un felis djabièrnè...

Definitivamente pa Gran Marcha di Karnaval 2019 bo mester bai wak e marcha ku un dùikbrel...

Ya ta 3 grupo kaba ku tin komo tema laga mi yam’é ‘bou di awa’...

Kada un tin un nòmber pe, kada un a ser kreativo den nan eskoho dje tema bou di awa...

Ayera nochi na St. Tropez den un ambiente karga ku e públiko dje tradishonal djaweps anochi Grupo di Karnaval Zoy’e a presentá nan trahe titulá ‘Rapture of the Seas’...

Mas tempran den anochi riba Gomezplein tabata Dushi Aventura ku a tene presentashon di nan trahe ku pa 2019 lo tin komo tema: ‘Máskara a kai’...

Mañan anochi 7’or ta turno pa Grupo Bliss presentá nan trahe pa Karnaval 2019...

Bliss su tema lo ta: ‘Empires of the Deep’ ku animashon musikal di ONE...

E presentashon ta tuma lugá na Acoya...

Amantenan di beisbòl e dianan aki ta den nan gloria, e weganan di MLB ku partisipashon di nos hungadónan lokal ta e punto di atenshon...

Na algun kas te hasta e shon ta permití pa wak beisbòl i no ta wòri ku e pèrdè algun kapítulo di novela...

Pasó si keda persistí pa wak novela, mucha hòmber ta bai wak beisbòl donde Altagracia...

Djadumingu awor, no lubidá riba e ‘cook out Bazar’ di Club Union Boneriano...

For di 11.30 te ku 6 or di atardi lo tin diferente stènt ku kumindanan variá i tambe artesania, kos dushi, mata i hopi mas...

Djadumingu awor ta fecha tambe pa e konsierto ‘Nos Rais Musikal’ organisá pa AMAK den kuadro di nan selebrashon di 50 aniversario...

Un repertorio di 30 kansion di dékada 40 pa 70 lo keda interpretá pa diferente di nos artistanan lokal...

E konsierto aki ta algu ku amante di músika lokal no mag pèrdè...

Despues dje parti di músika di ántes lo sigui ku presentashon di front di Buleria, Clinton Hato, Chemz, Dibo Doran, Jaido, tur kompaña pa e hóben músikonan di Junior All Star Orchestra, bou di direkshon di Gedion Chandler...

Djadumingu awor tin un show titulá ‘Star Fantasy’ kaminda e partisipantenan di Mini Beauty International 2018 lo kompetí den diferente kategoria di beyesa...

‘Star Fantasy’, un produkshon di IBFF ta tuma lugá na Renaissance...

Dia di Bándabou ta djadumingu awor, for di 10 or di mainta te ku 11 or di anochi lo tin aktividat den diferente bario na Bándabou...

Aktividatnan prinsipal lo ta konsentrá na Parke Himno i Bandera...

I e tradishonal ‘Kaya Chochoria’ lo no hasi falta ku un kantidat di stènt kaminda ta bende grill, kuminda krioyo, artesania, paña i mas...

Tin hopi kaminda pa bai e wikènt aki, dibertí na un manera sano i kòrda ‘No bebe i stür’...

Felis wikènt!.