Un bon siman pa tur nos lektornan...

E siman aki tin ‘brek’ den dje djárason awó...

E wikènt a bai bon, basta evento i públiko a respondé bon na nan...

Djasabra mèrdia nos a asistí na e rueda di prensa di Juni Juliet, esaki relashoná na e akuerdo ku el a yega ku Rignald Recordino relashoná ku e presentashon di ‘The Legends’ ku komposishonnan di Doble R...

Ta great ku a yega na un akuerdo, pero mi tin yen interogatorio ku si ta un akuerdo ku bo mester a yega na dje si òf no...

Motibu di mi pensamentu ta sinta den e echo ku si bo ta ‘cover’ kansion di un kompositor den fiesta bo no tin ku paga ‘royalties’, awor kon bin den e kaso aki si? ...

E loke a yega na dje na mi konsepto ta mas un ‘Gentlemen agreement’ entre e grupo enkabesá pa Juni Juliet i Rignald Recordino...

Ta algu mas di rèspèt, ku e ta algu ku legalmente bo por hasi algu kontra di dje...

Nos a kustumbrá aki ku kompositornan ta ninga kantantenan ku a yega di forma parti di nan banda pa nan interpretá nan piesanan ku otro banda...

Pero segun mi tanten ku bo no graba, bo no mester paga ‘royalties’...

Si dado kaso ta asina, anto mi tin un lista di kompositor ku mester kuminsá kobra ‘royalties’ serka algun banda...

Mi ta bai buska mas leu informashon riba e asuntu aki i próksimamente lo mi bin bek riba esaki ...

BLISS a presenta nan trahe pa Karnaval 2019 djasabra anochi dilanti di un bon públiko na Acoya...

Pa bo a drenta bo mester a para bo outo pafó riba Hugenholtszweg i kana bai paden ...

Bunita trahe ta loke ku a keda presentá...

Nos ta pendiente pa e próksimo simannan aki mas grupo tene presentashon di trahe pa Karnaval 2019...

E konsierto ‘Nos Rais Musikal’ tabata tremendo...

Tremendo pa e motibu ku nan a rebibá sigur 30 komposishon di pasado ku a risibí un areglo nobo i presentá ku Junior All Star Orchestra...

E idea tras dje proyekto ta tremendo i ounke públiko no a asistí manera a pensa, mester sigui anualmente ku e proyekto aki i dje forma ei sigui rebibá nos músika lokal...

Pabien na e hóbennan ku ta forma parti di Junior All Star Orchestra, tremendo presentashon i kompañamentu musikal...

Pa djabièrnè awor Fundashon di Karnaval di Bándabou ta bai duna informashon relashoná ku temporada di Karnaval 2019...

Lisette i su tim a organisá un rueda di prensa na Westpunt...

Si Westpunt, mané ba lesa ei, un bon pida kore pa duna sosten na FKBB...

Nos tei move, djárason ta liber, pues nos próksimo edishon ta djabièrnè...