Un bon siman pa tur nos lektornan...

Awaseru a kai, pero ta e eventonan den airu liber so tabatin problema...

Djasabra mardugá ma tuma nota di algun sitio kaminda públiko ta den e lokalidat i pafó nan outo ta bou di awa...

Djaweps awor Kas di Kultura lo tin reunion ku lidernan di gruponan di Tambú i Aguinaldo...

Durante dje anochi aki lo bira konosí e reglanan nobo ku Polis lo presentá pa loke ta trata e temporada aki di Tambú i Aguinaldo...

Mi ta pendiente pa mi tende ta kiko ta e reglanan nobo, pasó te ainda ta rumor tin pa loke ta trata e reglanan...

By the way, sra. Francisca a wòrdu mandá kas riba dunamentu di deklarashon relashoná ku aktividatnan di Tambú i Aguinaldo...

Ora ku e reglanan bira konosí, lo por saka konklushon ku Shon Francisca tabatin rason òf ku nan a tuma medida pasó el a sali i bisa bèrdat, pero ku kier a wanta esaki skondí te ora ta den porta di temporada di Tambú i Aguinaldo...

Ban wak kiko e resultado di e reunion lo bai bira, pasó mi ta na altura ku si e kambionan di regla ta drástiko ku esaki lo bai ta un sla masha duru mes pa e kustumber di tambú i aguinaldo na snèk i lugánan habrí...

Di otro banda, mester tene kuenta ku e situashon di tráfiko ku kada presentashon ta trese kuné...

Tin kaminda ku esaki no tin efekto, pero sitionan ku ta riba kaminda prinsipal esaki ta bai bira praktikamente imposibel pa un toká por tuma lugá...

Nos mester ta sinsero tambe ku tin algun grupo di tambú i aguinaldo ku ta atraé un grupo masha grandi públiko ku sea ta bai para dilanti dje grupo wak nan presentashon òf ta para na outo kantu di kaya ku nan bar den baul di outo i dal drinks i disfrutá dje muzik...

Gruponan di Karnaval a kontinuá ku nan presentashon di trahe...

Ayera nochi a toka turno na Jumping Jewels ku ta hasi esaki ...

Nan tema pa 2019 ta ‘Fiesta na Palacio’...

Den e siman aki tin algun grupo mas ku ta bai hasi anunsio di nan fecha di presentashon di trahe i tin otronan ku ya a pone fecha pa hasi esaki...

Na Aruba ayera nochi den presensia di nan Minister di Kultura, e organisashon SMAC a presentá nan ‘app’ di Karnaval ku e kalènder di Karnaval 2019...

Teknologia ta pone ku bo tin ku sigui inová pa bo mantené bo pueblo na altura di tur aktividatnan durante dje temporada di Karnaval...

Icons by Gio a mané kue un overdrive...

Nos a risibí mail ku 3 kansion nobo, ke men e mashin di produkshon ta riba ful spit pendiente nan debut dia 3 di novèmber próksimo...

Nos tei move, bon siman pa bo !...