Un felis djárason...

Ayera nochi áwaseru a sorprendé despues di dos dia ku tabata praktikamente seku...

E temporada di áwaseru ta yegando i esaki ta pone ku promotornan mester tene debidamente kuenta ku esaki ora nan ta organisá aktividatnan den aire liber...

Ma tuma nota ku tin kombersashonnan tumando lugá pa nos haña un lokalidat mas kaminda aktividatnan di farándula lo por tuma lugá...

Nos ta serka di ‘high season’ di farándula i promotornan sigur ta buskando lugánan apart pa organisá nan evento...

E sitio ku nos a mira ta sentral i tin sufisiente lugá di parker ku iluminashon...

Empresanan ku no ta bayendo bon ta buskando forma kon pa sigui hasi uso di nan edifisio i esun ku nos ta papiando di dje ta djis algun adaptashon i duna e parti pafó un ‘face lift’ i tin fiesta !...

E kaso di e lote di droga a pèrkurá pa un sin fin di komposishon pa e género di tambú ku ora tur keda grabá lo bira e tópiko pa fin di 2018...

Nos hendenan ta kreativo  i den tempu rèkòrt ta krea tur tipo di arte relashoná ku kualke kaso ku hala atenshon...

No pasó mi ta forma parti dje famia di KPC, pero huntu ku pueblo di Kòrsou e kaso mester keda resolvé i huntu nos mester sigui traha pa un mihó Kòrsou...

Nos patriotismo i amor pa Kòrsou mester resaltá den e kaso aki...

Pa loke ta trata farándula manera nos a indiká djaluna, mañan ta fecha pa nos tende kiko ta e reglanan ku lo tin pa presentashon di gruponan di tambú i aguinaldo...

Mi tin e leve impreshon ku gastunan pa organisá un evento públiko ku músika di tambú i aguinaldo lo bai subi loke lo pone ku e presentashonnan lo baha konsiderabel...

Pa evitá esaki Kas di Kultura lo tin di hunga un ròl determinante...

Ta na nan pa organisá eventonan tur siman den kolaborashon ku entre otro DMO pa parti di Punda i SKO pa Otrobanda...

E presentashonnan di ántes den Alameda i riba Plasa Brion mester bira un kustumber di tur siman...

Gruponan mester haña e oportunidat pa presentá i Gobièrnu, lesa Kas di Kultura lo mester duna su aporte ku kompensashon pa e gruponan...

Sitionan ku normalmente sa keda frekuentá pa baidónan di tambú i aguinaldo lo mester kumpli ku un kantidat di regla ku ta bai hasi e ponementu di grupo di tambú òf aguinaldo muchu karu...

E problema prinsipal den henter e asuntu aki ta sinta den e echo ku organisamentu dje aktividatnan manera a kustumbrá di organisá esaki ta strobando órden públiko i esaki no ta aseptabel...

Den esaki tambe sigur lo tin algun kaminda ku a daña pa otro, loke sigur ta di lamentá...

Nos tei move, djabièrnè nos tei bèk den otro edishon di ‘Louie Louie’...