Un felis djamars pa tur nos lektornan...

Mañan tin rueda di prensa di e popular jump in di e tim di softball di MCB...

Manera ta konosí nan a djòin ku ViseVèrsa i tambe HOTD i ta pendiente pa mañan presentá un konsepto nobo pa loke ta trata nan Jump In...

Un punto ku sigur lo bin dilanti ta e sitio kaminda jump in lo mester tuma lugá...

Manera ta konosí Kleine Werf no ta disponibel mas pa aktividatnan farandulero, esaki debí na e desaroyo dje área den un turístiko...

Otro jump in ku próksimamente lo tin ku duna informashon ta esun di Crazy Diamonds...

E popular Jump In di BAB e aña aki lo no por tuma lugá na Emmastad mas debí na e estado dje edifisio di Ontvanger ku a sufri daño relashoná ku e eksploshon ku a tuma lugá einan...

Lidernan di Crazy Diamonds a bai wak un sitio nobo kaba, pero ta pendiente pa kaba di tuma desishon riba esaki pa por pidi pèrmit i anunsiá nan sitio nobo pa e jump in...

I Estreno Mas Pikete ta informá ku mañan djárason lo tin oportunidat pa pasa hasi pago i tuma midi na ‘Bazaar Restaurant’ na WTC, esaki ta solamente pa e sekshon di EMP!...

Ayera nochi Glenn Thomas a kuminsá ku e promé edishon di ‘Rumba pa Tumba’ 2020 na TeleCuraçao...

Manera semper tremendo ambiente ta loke ku Glenn ta pone i tur ku ta trahando anochi ta disfrutá di e programa...

Esnan na Ulanda ta pone ‘wekker’ pa lanta trempan pa por sigui e programa na televishon...

Ma tuma nota di e promoshon ku e partisipantenan pa elekshon di Reina, Prens i Pancho grandi ta hasiendo pa nan partisipashon...

Esaki sigur ta yuda promové e evento i ku lo sòru sigur pa benta di karchi kana bon...

Djadumingu último e trompetista Jhonny Rivero a fayesé...

Jhonny aki na Kòrsou tabata konosí pa su partisipashon pa vários aña kaba komo trompetista na Festival di Tumba...

Su amigunan na Kòrsou i koleganan músiko sigur a keda sorprendé ku e informashon ku el a fayesé...

Ta basta aña Jhonny tabata bin Kòrsou i a forma parti di diferente banda ku a partisipá na Festival di Tumba...

Ma tende di un malkomprondementu ku a surgi ku un sekshon di brass lokal ...

Parse ku a aserká e grupo di supladónan pa nan hasi un trabou, nan ta kuminsá ku esaki pa despues nan bin tende ku a disidí di manda buska un sekshon di supladó for di Venezuela...

E kos no a kai den masha bon tera i loke ta mas laf dje situashon ta ku esun ku a buska nan na kuminsamentu no a ni pidi diskulpa i duna un splikashon di kon no ta hasi uso mas di nan servisio...

Ta manda el a manda respondi ku lider di un banda pa informá nan ku e trabou a kanselá...

Ma tuma nota ku tin algun banda ku lo manda buska nan sekshon di brass for di trempan pa dje forma ei ensayá i ta kla na ora, promé ku bo kere ya ta inskripshon di tumba i su siman siguiente ta Festival di Tumba...

E dianan aki bo ta haña tur areglista te lat anochi na telefòn ainda...

Ta trabou tin, ma kombersá ku un ayera i el a bisa mi ku kada partisipante ku e atenshon nesesario i e mester kumpli ku esaki...

E dianan aki ta afsprak stail di dòkter tin i si bo ta kla kompletu ta mas mihó ainda...

Un otro a splika mi ku apart di hasi areglo so, tin biaha bo ta haña bu ta praktikamente yuda e kompositor pa bolbe harma e tumba pa esaki por bira algu pa toka...

No ta kompositor so ta pone masha atenshon na nan letra pero areglistanan tambe ta sòru pa mantené nan kara na laira, pues no ta tur kos ta kue pone muzik su tras...

Tin biaha e kos ei ta fèrfelu, pero si e no ta mishi ku e hende e no ta bai hinka tempu den esaki...

Tin indikashon ku lo tin un premio grandi pa e ganadó dje aña aki di Festival di Tumba...

E organisashon tin esaki ketu ainda i nos ta spera ku djaweps awor na momentu dje rueda di prensa ku lo duna mas detaye riba e premio grandi aki...

Ma komprondé ku e produkshon dje aña aki pa loke ta Festival di Tumba tin un budget basta karu mará na dje...

Mester ta masha kreativo pa por yega pa kubri gastunan dje produkshon ...

Na Aruba un biaha mas e Parada di Fakkel a logra atraé 10 mil partisipante...

No a wega ta hopi hende riba pia pa e kantidat di gruponan ku segun mi no ta surpasá 15 grupo...

E evento meskos ku nos Marcha di Despedida aki na Kòrsou ta atraé masha turista for di e otro islanan...

Basta hende di Kòrsou ta bai Aruba pa Fakkel i di Aruba ta basta ta bin Kòrsou pa disfrutá di nos Marcha di Despedida...

Papiando di partisipashon na Gran Marcha, nos mester hasi menshon dje echo ku Fundashon JAG a keda gratamente sorprendí ku e partisipashon di e tripulantenan di un barku di marina spañó ku lo ta di bishita aki na Kòrsou...

Ta ser bisá ku ta mas di 200 marinero/ tripulante dje barku lo partisipá komo un grupo na nos Gran Marcha...

Bon nos tei move, mañan ta otro dia pa nos sigui traha pa adelanto di Kòrsou...

Nos ta den temporada di Karnaval, pero trabou tin !...