Nos tei!, un felis djamars na tur nos lektornan...

Preparashon pa Festival di Tumba 2020 ta kanando den bon direkshon...

Nos a komprondé ku ke kuminsá traha den e promé siman di desèmber riba e parti di limpiesa i mantenshon di Festival Center...

E transformashon di Festival Center lo ta estilo di Hak’e 2019 pero aun mas grandi...

Parse ku ta den e siman aki lo ta determinante pa e partner stratégiko pa Festival Center...

Ta pendiente pa firma un M.O.U. pa dje forma ei ofisialisá e union entre e organisashon ku lo djòin e organisashon di Festival Center pa duna e lugá no solamente un ‘face lift’, pero pa tambe sòru pa bin un renobashon pa loke ta trata sigur e área di kuminda den Festival Center...

Tin un plan traha ku lo bai krea un área di ‘food court’ den e área parti patras kaminda normalmente ta organisá shownan di ‘drift’...

E komishon ku mester presentá kambionan pa mehora Festival di Tumba ta enkabesá pa Gregory Colina i tin komo miembro Ravello Antoin, Ike Jesurun i Gilo Garmers...

Parse ku e komishon aki ta kla pa presentá AMAK i miembronan algun proposishon di kambio interesante...

E informashon ku Peter van der Pligt lo presentá komo artista invitá ku ERA a keda konfirmá...

E presentashon ku ERA lo tuma lugá riba djabièrnè 31 di yanüari 2020 durante di e anochi final i manera por spera Peter lo presentá e klásiko ‘Kumpli Ku ne’...

Ayera nochi ma komprondé tambe ku tin diferente kantante, sigur dos ku a bati na porta di e banda hóben Excellence pa dje forma ei partisipá ku nan den Festival di Tumba...

Nan ta mirando e potensial ku tin den e grupo di hóben aki...

Otro informashon ku nos a logra di optené ta indiká ku eks Rei di Tumba 1986, Efraim ‘Inchi’ Gumbs, tin un bòm prepará pa e di 50 edishon di Festival di Tumba. Ya el a aserká banda, areglista i tambe kantante pa interpretá su komposishon...

Tin algun kompositor konosí ku ta kla kaba ku nan komposishon i a manda esaki pa e areglista ...

Muchanan di skol di ku ‘trempan ta bende’...

Di informashon ku nos a risibí tin indikashon fuerte ku tin algun kantante residensia na Ulanda ku tambe ta pendiente pa forma parti dje tremendo selebrashon di 50 aniversario di Festival di Tumba...

E interes ta grandi, e kos mas importante ta pa logra di partisipá, hopi biaha tin kantante ku ta indiká ku nan ta kla pa partisipá, pero ora ku bai harma ta ripará ku e komposishon ku nan tin sea no ta sera òf no ta bira e loke ku nan a spera...

Awor bo ta trempan, pero si bo bai warda den pitu, pa bo kore inskribí sin ku bo ta kla na tempu, bo mes sa e ‘kos ei’ no ta bira nada...

E kompetensia pa e di 50 edishon di Tumba lo ta fuerte sigur, ta un edishon spesial ku lo ta orguyo pa un kompositor, areglista i kantante pa nan por bati riba pechu i grita ku nan a gana e di 50 edishon...

Otro siman nos tei bèk, Rumbo pa Festival di Tumba 2020...