WILLEMSTAD.- Lucky Pop, outor, a nase na Boneiru riba 15 mart 1959. E ta sintié un tiki mucha di Otrobanda dor ku su mayornan a biba den Curaçaostraat den Otrobanda pa despues bai biba na Boneiru.
Na Boneiru Lucky Pop ta nase na Ser’i Chawawa, un sitio den kurason di Antriol, kaminda el a biba te ku su 21 aña. Fo’i chikitu e tabata gusta skibi poema. Durante su añanan na skol básiko el a lesa hopi loke a bira base pa su karera literario.
Durante su añanan na Ulanda pa estudio el a skibi hopi (un total di entre 400 pa 500 poema skibi) i tabatin un programa di radio na Papiamentu kaminda e tabata deklamá su obranan.
Bèk na Boneiru e ta publiká su promé tomo di poema na 1996 bou di e título di ‘ De kleur van ’t bloed’ skibí na ulandes. Na 1998 e di dos tomo ‘ Mi amigu’ ta keda publiká. Despues di basta aña e di 3 tomo for di man di e outor Lucky Pop ta sali i ta hiba e título ‘ Als je ogen maar stralen/Basta bo wowonan ta bria. Den e tomo aki tin poemanan skibí na ulandes i papiamentu. Banda di e skirbimentu e outor ta pinta obranan ku pèn i pòtlot.
Na novèmber 2014, Lucky Pop ta risibí for di Gobièrnu di Boneiru un rekonosimentu pa su trabou komo outor. Un premio ku ta nifiká hopi pa e outor.
Hopi hóben a partisipá ku poemanan skirbi pa Lucky Pop na ‘Arte di Palabra’ ku a kai den premio na diferente okashon den ‘Arte di Palabra’ na Boneiru i Kòrsou.
Komo outor Lucky Pop a hasi diferente presentashon den e mundu literario na Boneiru, Kòrsou, Aruba i Ulanda.
Awendia Lucky Pop ta biba i ta traha komo dosente di ulandes na un skol sekundario na Kòrsou i ta skibiendo su outobiografia. Por spera mas tomo for di man di outor i otro obranan.
Pa mas informashon por yama +5999 5696597 òf e-mail: lucvicpop@hotmail.com