MERKA.- E kantaoutor portorikeño, Luis Fonsi a risibí djamars atardi shete rèkòrt di Guinness esaki danki na e alkanse mundial di su éksito ‘Despacito’, rekonosementu ku ta pone den kompania di grandinan di músika manera Lin-Manuel Miranda, Ozzy Osbourne, Rihanna i Taylor Swift.
E akto di rekonosementu a tuma lugá na Miami i Fonsi a bisa di ta sintié masha privilegiá i masha sorprendí pa ta un dje tiki músikonan ku ta logra 7 rèkòrt Guinness den mesun aña.
El a sigurá ku e ta masha agradesido na tur hende ku tabata involukrá ku e kansion, esaki refiriendo na e kompositor panameño, Erika Ender, Daddy Yankee i e astro di músika pop kanades, Justin Bieber ku a pèrkurá pa e kansion subi e merkado merikano, entre otro.
Ku ‘Despacito’ Fonsi kibra e rèkòrt di Guinness pa e kansion mas skucha na mundu, e promé video ku ta superá 5 mil mion ‘views’ riba YouTube, e video mas gusta riba Internet i e kansion ku mas siman sigui riba puesto number 1 di ‘Billboard Hot Latin Songs’.
Aserka el a keda rekonosé komo e ‘single’ ku e kantidat di 17 siman konsekutivo na puesto # 1 di ‘Hot 100 di Billboard’, e videoclip musikal mas mira riba Internet i e kansion mas reprodusí di un duo.
‘Mi ta bai kologá nan na mi muraya den kas ku hopi orguyo i mi tei selebrá e logro. Mi mama lo bai ta hopi orguyoso, asina Fonsi a atmití indikando ku ainda e ta sigui e impakto i alkanse di ‘Despacito’.