PANAMA.- E kantante mehikano, Luis Miguel a wòrdu di ‘boo’ dor di e públiko durante di un konsierto ku el a presentá djamars último na Panama i segun e medionan lo e mester a tira su mic riba un tékniko di zonido.
Prensa panameño a pone djárason riba ‘front page’ ku e ‘Sol de Mexico’ a lusi malu riba tarima i ku apénas el a komuniká ku e públiko. Aserka el a keha di kalor i di problemanan tékniko ku tabatin.
Un video mustrando momentu ku Luis Miguel a baha for di stage i bai diskutí ku un persona ‘backstage’ pa despues e tira e mic presuntamente riba e tékniko di zonido.
E artista di 48 aña ta hasiendo su ‘Tour 2019’ ku a hib’é gran parti di Latino Amerika. Despues di Panama e ta pendiente pa bai Costa Rica, El Salvador, Guatemala, República Dominicana i Puerto Rico.
Luis Miguel resientemente a resultá un dje prinsipal ganadónan di Latin Grammy ganando 2 galardon pa albùm di aña i mihó disko di músika Ranchera/ Mariachi, ámbos pa e produkshon musikal ‘Mexico por Siempre’.