RIO DE JANEIRO, BRASIL (AFP).- E presidente brasilero Luis Inácio Lula da Silva a bisa di ta dispuesto pa postulá su mes pa reelekshon den próksimo elekshon na Brasil pa evitá regreso na poder di “un fasista”, refiriendo bon kla na e eks-presidente Jair Bolsonaro.
“Lo mi no permití pa e pais aki bolbe keda goberná pa un fasista”, segun Lula a bisa den un entrevista na un radio emisora.
E veterano eks-sindikalista, di 78 aña, a asumí su di tres mandato di kuater aña den yanüari di 2023, despues di un viktoria pèrtá riba e ultraderechista Bolsonaro (2019-2022).
Puntrá riba e difikultat di su edat pa un futuro reelekshon den òktober di 2026, na momento ku e ta serka di kumpli 81 aña, el a respondé ku “lo mi ta den flor di bida”.
“Si ta nesesario bira kandidato pa evitá ku tipo di hende asina ta bolbe goberná, bosnan por ta sigur ku na edat di 80 aña bosnan lo mira mi komo hende di 40 i lo mi por ta kandidato atrobe”, el a bisa. “Pero no ta e promé hipótesis”, el a agregá, “tin hopi bon hende komo kandidato”.
Lula a goberná e gigante pais suramerikano den dos mandato konsekutivo di 2003 pa 2010.
Bolsonaro a keda inhabilitá pa Tribunal Superior Elektoral pa okupá funshon di elekshon popular te ku 2030 pa motibu di a duna informashon falsu riba e sistema di votashon. Apesar di esei, e ta sigui hopi aktivo den polítika na kabes di Partido Liberal, ku representashon amplio den parlamento.
