WILLEMSTAD.- Luna Yen e show di talento mas gustá bou di hóben lo bai ranka sali djadumingu 29 di òktober ku tayer i oudishon na La Tentashon.
Luna Yen ta un kompetensia kaminda hóbennan por demostrá nan talento den diferente disipliná artístiko.
Dia 29 di òktober lo tin oudishon pa asina kuminsá buska e hóbennan ku lo por partisipá den e gran Final di Luna Yen 2017.
E dia aki nos lo tin tayer di aktuashon di 13:00 pa 13:40’or, tayer di kanto di 13:40 pa 14:20’or i tayer di baile di 14:20 pa 15:00’or. E tayer nan aki ta spesialmente pa e hóbennan ku kisas por tin un tiki miedu òf ke drecha nan téknika promé ku e oudishon kuminsá.
E oudishon mes lo ta di 15:00 -17:00’or.
E tayernan lo ta grátis pa tur hóben. Bo por partisipá den tur 3 tayer òf esun di bo preferensia. Si dado kaso bo no por asistí na e tayernan, no ta problema, bo por bin e oudishon mas lat.
Bo por partisipá individual òf den grupo di maksimal 5 hende.
Manda bo informashon via mail na info.lunablou@gmail.com òf via Facebook na: Luna Yen, e show di talento pa hóben. Tambe por yama Zona Kultural (Teatro Luna Blou) na 462-2209.