WILLEMSTAD.- Djasabra aki 2 di desèmber lo tin e Gran Final di Luna Yen, e show di talento pa Hubentut 8’or di anochi na Zona Kultural sala La Tentashon.
7 partisipante lo ta kompitiendo djasabra aki pa wak ken lo bai ku e título máksimo.
Pa por a saka e finalista nan aki, tabatin un eliminatorio dia 18 di novèmber último. Un total di 13 partisipante a kompetí e anochi ei den kual e huradonan, Abigahie Pinedo (Aktuashon), NJ (Baile) & Tyson Hill (Kanto) mester a skohe 6 a 7 finalista nan pa bai e gran final di Luna Yen.
E finalista nan ta: Flow  Magic (Baile), Naetisha Rosaria (Kanto),
Dilara Tramm (Kanto), Christefer Damiana (Aktuashon), Swarovski Dancers (Baile), The Royal Diamond (Baile) &  Raymick Martha (Aktuashon).
Huntu ku nan nos lo tin komo invitadonan speshal finalista nan di Gang di Arte (Aruba) i Dance Brothers, e ganadónan di Luna Yen 2016.
Kas di Kultura, Zona Kultural i Gobièrnu di Kòrsou ta invitá henter pueblo di Kòrsou bin presensia e final di Luna Yen djasabra aki 2 di desèmber 8’or di anochi na La Tentashon.
Karchi na rason di 10 florin ta optenibel na Zona Kultural ántes, Teatro Luna Blou.
Pa mas informashon por yama na Zona Kultural (Teatro Luna Blou) na 462-2209.