NEW YORK, MERKA.- E ophetonan personal di Madonna no por keda subastá, asina un hues na New York a dikta den un sentensia.
E diva di Pop, Madonna a demandá e empresa di subasta ‘Gotta Have Rock and Roll’, pa evitá ku un kantidat di opheto personal dje artista lo a keda bendé via di subasta.
E portal spesialisá den subasta di artíkulonan di ‘rock and roll’ i ‘pop’ a anunsiá pa awe djárason un subasta ku lo a kontené mas ku 100 artíkulo personal di e artista.
Entre e ophetonan na benta a keda anunsiá potrètnan privá, grabashon no editá, paña íntimo ku e kantante a yega di usa i korespondensia di e artista ku famia, famoso nan i eks pareha.
Sorprendí pa e notisia, Madonna a afirmá ku e no tabata sa mes ku e ophetonan no ta den su poder. E artista a mustra bastante konmoshoná pa enkontrá entre e artíkulonan e benta di un karta ku e rapper ‘Tupac Shakur’, e tempu ei pareha dje artista’ ku esaki a manda tempu e tabata kumpli ku un kondena den prisòn.
‘Ma keda sorprendí pa deskubrí ku e subasta tabata inkluí e karta di Shakur. Nunka ma bende, regalá o transferí o deshasí di e karta di Shakur”, asina e kantante a afirmá.
Madonna ta akusá komo responsabel dirèkt pa e benta di e artíkulonan via di subasta e dama, Darlene Lutz, kende den pasado tabata su asesor artístiko i amiga personal.
E kas di subasta a premirá ku nan lo a risibí mas o ménos 400 mil dòler pa e karta di Shakur.