MADRID, AP.- E minister di Sanidat na Spaña a anunsiá djaluna ku lo bini un oumento fuerte di kasonan di coronavirus den i alrededor di Madrid, i a informá ku tur skol den e region, inkluyendo skolnan preparatorio i universidatnan, lo keda sera durante dos siman desde mañan.
Salvador Illa a anunsiá un total di 1.204 kaso konfirmá, 28 morto i 74 persona den terapia intensivo. Esaki ta un oumento di mas di 200 infekshon desde mèrdia. E kasonan aki ta impliká un deterioro den e situashon di Spaña.
E kanal di televishon nashonal TVE a bisa ku e medidanan na Madrid lo afektá kasi 1,2 mion studiante.
Aparte ku lo sera skolnan, e minister a anunsiá un serie di rekomendashon, inkluyendo pa kompanianan redusí orario di trabou òf laga empleadonan laborá for di kas. Tur hende a wòrdu supliká pa limitá biahenan den e region. Illa a bisa ku djamars lo anunsiá medidanan adishonal.
Madrid a registrá mas di mitar kaso di coronavirus den e pais i mayoria infekshon ta vinkulá ku asilo di ansianonan i trahadónan di salú.
E ministerio a bisa ku Spaña ta pasado dor di un etapa di “Kontenshon” pa un “kontenshon reforsá” den region di Madrid i den siudatnan di Vitoria i Labastida na Pais Vasco. Esakinan ta wòrdu konsiderá komo áreanan rápido di propagashon.
